“Монголын худалдаа, хөрөнгө оруулалт, өв соёл” чуулган ирэх сарын 15-наас 25-ны өдрүүдэд АНУ-ын Вашингтон, Канад улсын Торонто хотод тус тус зохион байгуулагдах юм байна.

Вашингтон хотын Дэлхийн худалдааны төвд зохион байгуулагдах чуулганы үеэр “Монголд үйлдвэрлэв” үзэсгэлэн худалдаа гарах аж. Мөн оролцогч нар Олон улсын худалдааны төвийн 100 гаруй орны 330 төвийг хамарсан 750 мянга гаруй бизнес эрхлэгчтэй ажил хэргийн холбоо тогтоож, үйлдвэрлэл-технологи, бизнес эрхлэлтийн хүрээнд өөрийн бизнес үйл ажиллагаа болон улс орноо сурталчлан таниулах боломжтой ажээ.

Энэ удаагийн үйл ажиллагаа үйлдвэр, ХАА, газар тариалан, эрчим хүч, барилга, тээвэр, соёл урлаг, аялал жуулчлал, мэдээллийн технологи, анагаах ухаан, банк санхүү, түүн дотроо финтек, харилцаа холбоо, уул уурхайн салбарыг хамарч буй юм байна.

Цахим болон тусгайлсан VIP бизнес уулзалт, бизнесийн сургалт-семинар хэлбэрээр болж, олон улсын 40 гаруй хөрөнгө оруулагч нарт төсөл танилцуулан соёл урлагаа толилуулах аж. Эдгээр үйл ажиллагааг чуулган болон үзэсгэлэн худалдаа дууссаны дараа мэдээллийн албан ёсны сувгуудаар хоёр сар сурталчлах юм байна.