Өнгөрсөн зун Лионель Мессигээ алдаж, нөхөж баршгүй том ан цавтай болсон Барселона шинэ улирлын эхлэлийг тааруу тавиад байна. Ла лигт зургадугаар байрт бичигдэж буй Каталоны баг өчигдөр (2021.09.29) УЕФА Аваргуудын лигийн ээлжит тоглолтоо Португалын Бенфикагийн эсрэг хийж, 3-0 гэсэн харьцаатай ялагдав. Энэхүү тоглолтын дараа тус багийн ахлах дасгалжуулагч Рональд Куманы халаа сэлгээний асуудал хурцаар хөндөгдсөн.

Өчигдөр тоглолтын дараа Рональд Куман хэвлэлд өгсөн ярилцлагадаа “Клубтай холбоотой хүмүүс одоогийн Барселонагийн нөхцөл байдлыг олж харахгүй байх шиг байна. Би; асуудалтай нүүр тулна. Мэдээж, бид цаашдаа сайжрах боломжтой ч Аваргуудын лигт түрүүлэхгүй. Энэ баг хуучин шигээ биш болсон. Хэн ч харсан ойлгомжтой. Ийм үр дүн авахад хэцүү байна. Бид эрт гоол алдсаныхаа дараа хариуг нь барих гээд гоол оруулж чадсангүй. Эсрэг баг маань хүчтэй, хурдан байлаа. Биднээс илүү олон баг бий” гэжээ.

Харин Барселонагийн залуу тамирчин Фрэнки дэ Йонг “Дасгалжуулагч солилоо гээд асуудал шийдэгдэхгүй ээ. Би Куманы талаар ярихгүй. Миний хэрэг биш. Бид хамтдаа эцсээ хүртэл тэмцэж, энэ нүхнээс гарах хэрэгтэй” хэмээн ярьжээ.

Эх сурвалжуудын мэдээлж буйгаар өнөөдөр Барселонагийн Удирдах зөвлөлийнхөн хурал зарлаж, Куманы ирээдүйг шийдэх аж. Хэрэв Куман халагдвал түүний оронд Шави, Роберто Мартинез нарын нэр шинэ дасгалжуулагчид яригдаж байна.