БНСУ-ын ерөнхийлөгч Ли Мүн Бак Солонгосыг Японы милитаристуудын түрэмгийллээс чөлөөлсний 65 жилийн ойгоор хэлсэн үгэндээ Өмнөд болон Хойд Солонгосыг нэгтгэх төлөвлөгөөнийхөө талаар дурджээ. Түүний төлөвлөж байгаагаар бол энэ төлөвлөгөөг хэрэгжүүлэхийн тулд нэг триллион ам.долларын хөрөнгө шаардагдах бололтой. Энэ хөрөнгийг “босгох-ын тулд Өмнөд Солонгосын одоо байгаа татварын хэмжээг 2 хувиар нэмэгдүүлэн 60 жил хурааж байж бий болгох гэнэ. Хоёр Солонгосыг нэгтгэх санаачилгыг Өмнөд Солонгосын хүн амын  60 хувь нь дэмжиж байгаа боловч хөрөнгө мөнгөтэй холбоотой энэхүү төлөвлөгөө биелэхэд маш хол санагдаж байгаагаа илэрхийлжээ.

Өмнөд Солонгосын ерөнхийлөгч өөрийн төлөвлөгөөгөө биелүүлэхийн тулд эхлээд Хойд Солонгосын цөмийн зэвсгийг хураах асуудлыг шийдэх учиртай гэнэ. Дараагийн ээлжинд нь хоёр Солонгосын эдийн засгийг нэгтгэх үйл ажиллагаа болох бөгөөд ингэснээр Хойд Солонгосын эдийн засаг өсөж дэвжих учиртай ажээ. Үүний дараагаар хоёр орны хоорондхи системийн болон бусад ялгаанууд аажмаар арилж нэг улс болох бололцоо бүрдэх гэнэ. БНСУ-ын ерөнхийлөгч хоёр Солонгос нэгдэнэ гэдэгт итгэлтэй байдгаа илэрхийлсэн боловч чухам хэзээ энэ үйл явц хэрэгжих талаар ямар нэг цаг хугацаа заагаагүй байна.

                                    М.Наст