УИХ-ын дарга АНУ-д ажлын айлчлал хийв | News.MN

УИХ-ын дарга АНУ-д ажлын айлчлал хийв

УИХ-ын дарга АНУ-д ажлын айлчлал хийв

2021 оны есдүгээр сарын 17-ны өдөр эхэлсэн энэхүү айлчлалын хүрээнд Сан Франциско хотноо Азийн сангийн ерөнхийлөгч Дэвид Арнолд Монгол Улсын Их Хурлын дарга Г.Занданшатарт бараалхав.

Азийн сангийн ерөнхийлөгч Дэвид Арнолд Монголын парламентын тэргүүн, төлөөлөгчидтэй уулзаж байгаад баяртай байгаагаа илэрхийлж, Ази дахь сангийнхаа хэрэгжүүлж буй төсөл хөтөлбөрийн цар хүрээг өргөжүүлэх, мөн сангийнхаа үйл ажиллагааг дэмжигч, хандивлагч орнуудын тоог нэмэгдүүлэхэд анхаарч ажиллаж байгаа тухайгаа уулзалтын үеэр онцлон тэмдэглэв.

Азийн сан нь Монгол Улсад ардчиллыг бэхжүүлэх, авилгыг бууруулах, уур амьсгалын өөрчлөлтийн нөлөөг багасгах болон хүйсийн тэнцвэрт байдлыг нэмэгдүүлэх зэрэг чиглэлээр үйл ажиллагаа явуулж ирсэн. 1993 онд Улаанбаатар хотод салбараа нээж байсан Азийн сан нь дээр дурдсан асуудлуудыг шийдвэрлэхэд Монгол Улсын Засгийн газар, төрийн болон төрийн бус байгууллагуудтай нягт ажилласаар иржээ.

Уулзалтад Улсын Их Хурлын гишүүн Т.Аубакир, Х.Булгантуяа, Ж.Мөнхбат, Б.Саранчимэг, Ц.Цэрэнпунцаг, Азийн сангийн Хөтөлбөр хариуцсан тэргүүн дэд ерөнхийлөгч Гордон Хейн, Олон нийттэх харилцах асуудал хариуцсан дэд ерөнхийлөгч Ами Овалле болон бусад албаны хүмүүс байлцаж, талууд Монголын ардчиллын ололт амжилт, тулгамдаж байгаа асуудлууд зэрэг өргөн хүрээнд яриа өрнүүлэв.

Стэнфордын их сургуульд илтгэл тавьж, “Apple Inc”-тэй хамтын ажиллагааны яриа хэлэлцээ өрнүүлэв

Америкийн Нэгдсэн Улсад ажлын айлчлал хийж байгаа Монгол Улсын Их Хурлын дарга Г.Занданшатар Азийн сангийн удирдлагуудтай уулзалт хийсний дараа өөрийн суралцсан Стэнфордын Их сургуулийн Ази, Номхон далайн судалгааны төвд зочлов.

Энэ үеэр Улсын Их Хурлын дарга Г.Занданшатар “Ардчиллыг бэхжүүлэхэд тулгарч буй бэрхшээлүүд” сэдвээр илтгэл тавьсан юм.

Тэрбээр, Монгол Улсад шинэ Үндсэн хуулийг 1992 онд баталж, цаг үе, нийгмийн шаардлагаар өнгөрсөн хугацаанд Үндсэн хуульд нэмэлт, өөрчлөлт оруулах шаардлага бий болсон талаар дурдаж, мөн Үндсэн хуульд өөрчлөлт оруулах явцад иргэд, эрдэмтдийн оролцоог хангаж, улс төрийн зөвшилцөлд хүрч чадсаныг онцолж байв. Үндсэн хуульд оруулсан нэмэлт, өөрчлөлт нь Парламентын ардчиллыг төлөвшүүлэх, Гүйцэтгэх засаглалын тогтвортой байдлыг хангах, Шүүх эрх мэдлийн хариуцлагыг дээшлүүлж, хараат бус байдлыг хангах, Нутгийн удирдлагын бие даасан байдлыг бэхжүүлэх гэсэн гол дөрвөн чиглэлтэй болохыг дурдав.

Улсын Их Хурлын дарга болон гишүүд Стэнфордын Их сургуулийн үйл ажиллагаатай танилцсаны дараа Сан Франциско хотын Кино комиссын гүйцэтгэх захирал хатагтай Сюзанна Грисон Роббинсонтой уулзалт хийсэн юм.

Сан Франциско хотын Кино комисс нь хотдоо ажлын байр бий болгох, эдийн засгийн өгөөжийг хүртэх, жуулчид, хөрөнгө оруулагчдыг татах зорилгоор кино салбарыг хөгжүүлэхийг эрмэлздэг юм байна. Тус комис нь Сан Франциско хотод бүрэн хэмжээний, телевизийн болон интернэтийн олон ангит кино, шоу, баримтат кино, реклам болон фото зураг авах зөвшөөрлийг олгодог аж.

Уулзалтын үеэр Улсын Их Хурлын дарга Г.Занданшатар "Үзэсгэлэнт байгаль, баялаг түүхтэй Монгол Улс нь дэлхийн кино, телевизийн үйлдвэрлэлийн сонирхол татахуйц газар бөгөөд Монголын кино бүтээгчид дэлхийн тавцанд хүлээн зөвшөөрөгдөх асар их нөөц бололцоотой.

Монгол Улсын Засгийн газар бүтээлч үйлдвэрлэл, тэр дундаа кино үйлдвэрлэлийг хөгжүүлэхийг эрмэлзэж байна. Энэ хүрээнд өнгөрсөн долоодугаар сард манай парламент Кино урлагийн тухай хуулийг баталсан.

Энэ хуулиар кино, телевизийн үйлдвэрлэлийн төсөлд оролцох дотоодын болон дэлхийн студиудэд урамшуулал, дэмжлэг үзүүлэхийг албан ёсоор хуульчилсан. Манай нэр хүндтэй кино бүтээгчдийн нэг болох "Fantastic Production" продакшны баг удахгүй гарах түүхэн сериалаа дэлхийн тавцан дээр гаргахаар түгээх компаниудтай хэлэлцэж байна" гэв.

Тэрбээр Сан Франциско хотын кино контент үйлдвэрлэгчдийг Монгол Улсад зураг авалт хийх, Монголын кино уран бүтээлчидтэй хамтран ажиллахыг хүссэн юм. Хатагтай Сюзанна Грисон Роббинсон Сан Франциско хотод зохион байгуулагддаг олон улсын кино наадамд Монголын уран бүтээлчдийг урихдаа таатай байх болно гэдгийг дуулгав.

Үүний дараа Монголын парламентын төлөөлөгчид "Apple" компанийн үйл ажиллагаатай танилцлаа. Мэдээллийн технологийн салбарт дэлхийд тэргүүлэгч компаниудын өлгий нутаг гэгддэг цахиурын хөндийд Apple парк байрладаг юм.

Улсын Их Хурлын даргыг “Apple Inc” компанийн төлөөлөл Ранди Марсден хүлээн авч уулзсан юм.

“Apple Inc” компани Монгол Улсын Засгийн газар, ТББ-уудтай хамтран Монгол Улсад Ковид-19 вирусийн тархалтыг хянах технологийн чухал төслийг хэрэгжүүлж байгаа бөгөөд энэхүү төслийн менежерээр ноён Ранди Марсден амжилттай ажиллаж байгаад Улсын Их Хурлын дарга Г.Занданшатар талархал илэрхийлэв.

Төслийн дэмжлэгтэйгээр Улсын Онцгой комисс, Эрүүл мэндийн яам, иргэдийн дунд “ERSDEL” программыг нэвтрүүлэн ашиглаж байгаа билээ.

Улсын Их Хурлын дарга Г.Занданшатар Улсын Их Хурал, Засгийн газар Ковид-19 цар тахлын эсрэг олон чухал арга хэмжээ авч, парламентаас хууль баталж, Засгийн газраас тусгай хөтөлбөр гарган ажиллаж буйг дурдаад, “Apple Inc” зэрэг дэлхийн түвшний технологийн компаниудтай хамтран ажиллах аливаа санаачилгыг парламентаас бүрэн дэмжих болно гэлээ.

Монгол Улс хүүхэд залуустаа дэлхийн түвшний боловсрол олгоход онцгойлон анхаарч, мэдээллийн технологи, компьютер, кодчилол, программчлалын чиглэлээр сайн мэргэжилтэнтэй болохыг зорилгоо болгож байна. Тиймээс энэ чиглэлээр “Apple Inc” компанитай хамтран ажиллах сонирхолтой байна. Одоогоор “Apple Park”-д нэг монгол инженер ажиллаж байгаа.

Цаашид бид янз бүрийн төслүүдээр дамжуулан “Apple Inc” болон Монгол Улс хооронд идэвхтэй хамтын ажиллагаа өрнүүлэх сонирхолтой байна.  Монгол бол зэс, газрын ховор элемент, лити зэрэг байгалийн баялаг ихтэй орон.  Тиймээс “Apple Inc” болон түүний нийлүүлэлтийн сүлжээний түншүүдтэй олборлох үйлдвэрлэлийн салбарт хамтрах боломж бий. Түүнчлэн боломжит хамтын ажиллагааны өөр нэг чиглэл бол уур амьсгалын өөрчлөлтийн салбар юм. Монгол Улс уур амьсгалын өөрчлөлтөд ихээхэн өртөж буй. Өөрчлөлтийг бууруулахтай холбоотой төслийг “Apple Inc”-тэй хамтран боловсруулах, хэрэгжүүлэх сонирхолтой байна гэлээ.

 

Энэ мэдээнд өгөх таны сэтгэгдэл?
1
ЗөвЗөв
1
ХахаХаха
1
БурууБуруу
0
ХөөрхөнХөөрхөн
0
ГайхмаарГайхмаар
0
ХарамсалтайХарамсалтай
0
ТэнэглэлТэнэглэл
Баярлалаа!

Холбоотой мэдээ

5 сэтгэгдэл

News.mn сайтад сэтгэгдэл оруулахад анхаарах зүйлс

Avatar

Зочин 2021-09-20 203.91.115.52

Бага Тэнгэрийн хөршүүд АНУ-д ямар бялуугаа хөөцөлдөж яваа юм бол? Конгрессиын удирдлага жриагүй бололтой. Энэ Стенфордоос удирдамжаа авдаг болжээ дээ.

Avatar

Зочин 2021-09-20 202.126.89.170

Цэрэнпунцаг гишуун СанФранциско дахь хаусдаа энэ хэдэн хунийг цай уулгаж дээ

Avatar

Зочин 2021-09-20 103.26.195.203

Монголд америкчуудаар алимны мод тариулах гэж байгаа юм байх даа?

Avatar

Зочин 2021-09-20 66.181.161.60

Ерөнхийлөгч нь Нью-Йорк явлаа гэсэн. Гэтэл УИХ-ын дарга нь бас тэнд цохиж явдаг?!! Энд ажил хариуцах чадваргүй нэг бандийг ганцааранг нь орхичихоод юу бодож явдаг хоёр вэ??? Энэ улс орныхоо, ард иргэдийнхээ байж байгаа царайг хар, та нар??!! Олон балчир хүүхдээ хоол ундгүй эзгүй орхичихоод хэд хоног архидаад алга болдог согтуу эцэгтэй дампуу айл шиг л байх юмаа!!!

Avatar

Зочин 2021-09-20 66.181.188.114

№1,2 ХОЁУЛАА ЗЭРЭГ АНУ-Д ЯВЖ БАЙЖ БОЛЖ БАЙГАА ЮМ УУ, АЮУЛГҮЙН ЗӨВЛӨЛ ДЭЭР ЯРЬСАН Л БАЙДАГ БАЙХ ДАА

NewsMN Гар утасны хувилбар Татах
NEWS.mn

Мэдээллийн эх сурвалж