Жил бүр өмнөд туйл дээгүүр үүсдэг озоны цоорхой энэ жил талбайгаараа Антарктидаас давсан гэж Европын холбооны Коперникүсын агаар мандал хянах албаны эрдэмтэд тооцоолжээ.

Эрдэмтдийн мэдээлж байгаагаар Озоны давхарга жил бүрийн наймдугаар сараас аравдугаар сарын хооронд цоорч, тэгэхдээ есдүгээр сарын дунд үед хамгийн том хэмжээндээ хүрдэг, арванхоёрдугаар сараас эхлэн аажмаар буцаж нөхөгддөг аж.

Харин энэ жилийн хувьд озоны цоорхой өнгөрсөн долоо хоногт мэдэгдэхүйц томорсны дараа 1979 оноос хойш тооцсон дундаж хэмжээнээсээ 75 хувиар илүү талбайтай болжээ.

Озоны давхарга далайн түвшнээс дээш 14-35 км-т оршиж, нарны хэт ягаан туяаг дэлхийд нэвтрэхээс сэргийлдэг билээ. Гэвч хүн төрөлхтний буруутай үйл ажиллагаанаас болж хлор, бром зэрэг бодисуудын нөлөөгөөр озоны давхарга ихээр цоорох болсон юм. Түүнчлэн озоны цоорхой өмнөд туйлын өвлийн улиралд маш сөргөөр нөлөөлж байгаа юм.

Иймд сүүлийн үед озоны давхаргыг нөхөх, илүү том цоолохгүй байх тал дээр олон улс, эрдэмтэд ихээр анхаарч, мэдэгдэхүйц амжилтанд хүрч байгаа билээ. Сүүлийн жилүүдэд озоны давхарга илүү хурдтай сэргэдэг болсон ч мэргэжилтнүүдийн хэлж байгаагаар 2060-2070 он болтол бүрэн нөхөгдөхгүй гэнэ.

Эх сурвалж: CNN