АНУ-ын цэргийн сүүлийн онгоц өнгөрсөн сарын 31-нд Кабулыг орхисноос хойш Афганистанаас анх удаа олон улсын тусгай үүргийн нислэг хийж, Нэгдсэн Вант улсын иргэд тэргүүтэй хэдэн арван гадаад иргэн Катарт очжээ.

Тухайлбал, Катарын нийслэл Доха хотод өчигдөр, өнөөдөр/2021.9.9, 10/ хоёр ч удаа тусгай үүргийн нислэг газардсан гэнэ.

АНУ-ын төрийн нарийн бичгийн дарга Энтони Блинкен сүүлд Катарт айлчлахдаа тусгай үүргийн нислэг үйлдэж, АНУ-ын иргэдээ татан авах ажиллагаанд хамрагдаж чадаагүй иргэд, холбоотнуудаа татахад дэмжлэг үзүүлэхээ амласан юм.

Учир нь яаруу сандруу хоёр долоо хоног үргэлжилж, амласан хугацаандаа амжихын тулд хүчээр шахуу дуусгасан АНУ-ын иргэдээ татаж авах ажиллагаанд 100 гаруй америк иргэн, хэдэн зуун америкчүүдтай хамтран, тэдний төлөө ажиллаж байсан афганчууд багтаж чадалгүй эрсдэлтэй байдалд үлдсэн байна.

Харин эх сурвалжуудын мэдээлснээр энэ удаагийн тусгай үүргийн нислэгээр өчигдөр/2021.9.9/ нийт 113 хүн Катарт ирсний 13 нь Нэгдсэн Вант улсын иргэд аж. Мөн АНУ-ын баталснаар дээрх нислэгт хэд хэдэн америк иргэд, Канадын 43, Нидерландын 13 иргэн  дээрх нислэгт багтаж, аюулгүй газарт очжээ. Иймд олон улс Катарыг дээрх нислэгийг зохион байгуулсанд талархаж, нарийн төвөгтэй дипломат ажиллагааг чадварлаг зохицуулсанд сайшааж байна. Түүнчлэн АНУ-ын талаас иргэдийг нь гаргахад мэргэжлийн, бизнес түнш мэт хамтран ажилласанд талибуудад талархал илэрхийлсэн байна.

Талибууд сэтгүүлчдийг аймшигтай зоджээ

Тусгай үүргийн нислэгээр Катарт очсон иргэдийн дунд хоёр сэтгүүлч байсан нь хувцсаа тайлж, Кабулд байдал хэр байгааг биеэрээ харуулжээ. Тэд энэ долоо хоногт болсон жагсаалыг сурвалжилж яваад талибуудада баривчлагдаж, хэрцгийгээр зодуулсан гэнэ.

Тэд эмэгтэйчүүдийн эрхийг хамгаалах жагсаалыг сурвалжилж явахдаа баривчлагдсан гэнэ. Зураглаач Ниматулла Накди “Нэг талиб миний толгой дээр гишгээд шал мөргүүлж байсан. Тэгээд бөөнөөрөө нийлж нүүрлүү минь олон удаа өшиглөсөн. Би өөрийгөө үхэх нь л гэж бодож байлаа” гэж мэдүүлжээ.

Эх сурвалж: CNN BBC