Сүхбаатар аймгийн Түмэнцогт суманд өчигдөр (2021.09.06) 10.00 цагийн орчимд нийтийн байранд гал гарчээ. Энэ талаар тус аймгийн онцгой байдлын газартай холбогдож тодруулахад "Одоогоор галын шалтгаан нөхцөл болоод хохирлын хэмжээг тогтоохоор аймгийн Онцгой байдлын газар, сумын цагдаагийн газрын бие бүрэлдэхүүн ажиллаж байна. Гал гарсан байр нь хуучны модон барилга байсан учир гал богино хугацаанд газар авч, бүхэлдээ шатсан. Урьдчилсан байдлаар 10 гаруй өрх амьдрах гэргүй болоод байна" гэсэн юм.

Харин тус сумын Засаг даргын тамгын газартай холбогдож, үүсээд буй нөхцөл байдал болон тухайн айл өрхөд ямар тусламж үзүүлж буй талаар асуухад “Нийтийн байранд ойролцоогоор 13 айл амьдардаг байсан. Галын шалтгааныг тодруулахаар албаны хүмүүс ажиллаж байна.

Хүмүүс тухайн үед гал гарч байгааг мэдээд, аюулгүй байдлаа бодоод, байрнаас гарч зогссон байсан. Гал хормын дотор гарч, 30 орчим минут тухайн барилга шатсан.

Сумын Засаг даргын тамгын газраас тэдгээр айл өрхөд туслахаар гурван гэр барьж, гэр бүлүүдийг оруулсан. Харин зарим айлууд хамаатан садан болон бусад танил айлдаа түр байрлаж байна. Галын шалтгаан, хохирлын хэмжээг тодорхойлно. Модон барилга учраас гал богино хугацаанд дүрэлзсэн. Сумын ард иргэд Засаг даргын тамгын газрын алба хаагчид унтраахыг оролдсон ч оч үсрээд, ойртох ямар ч боломжгүй байсан” гэлээ.