АНУ-ын Калифорни мужид үргэлжилж буй ой хээрийн түймрийн улмаас Тахой нуурын эрэг орчмын хэдэн арван мянган оршин суугчийг нүүлгэн шилжүүлэхээр болжээ. Тус мужид хоёр долоо хоногийн өмнөөс дэгдсэн “Caldor Fire” өдгөө 191 мянган акр газрыг хамраад буй юм. Түймрийг унтраахаар 3500 орчим гал сөнөөгчийг дайчилсан боловч ердөө 16 хувийг нь унтраажээ.

Нэг эмнэлгийг бүхэлд нь нүүлгэн шилжүүлэх шаардлага тулгарч, өвчтөнүүдийг мужийн өөр хэсгүүд рүү шилжүүлсэн талаар эрх баригчид мэдээлэв. Одоогийн байдлаар таван хүн гэмтэж бэртэн, 700 гаруй барилга, байгууламж шатаж сүйдсэн байна.

Аялал жуулчлалын бүс болох Өмнөд Тахой нуурын эрэг болон ойр орчмын 22 мянган оршин суугчийг нүүлгэн шилжүүлэх тушаалыг Даваа гаригийн өглөө баталжээ. Мөн АНУ-ын Ойн алба хээрийн түймэр гарсантай холбогдуулан Калифорнийн үндэсний ойн бүс рүү наймдугаар сарын 31-нээс есдүгээр сарын 17-ныг хүртэл хүн нэвтрэхийг хоригложээ.

“Caldor Fire” нь өдгөө Калифорни мужид идэвхитэй дэгдэж байгаа долоон түймрийн нэг. Хамгийн том түймэр болох “Dixie Fire” нь долдугаар сарын дундуур гарч эхэлсэн бөгөөд нийт 800 мянга гаруй акр газрыг сүйтгээд буй юм. Учруулсан хор хохиролын хэмжээгээр Калифорнийн түүхэнд хоёрдугаарт орох том түймрээр тодорсон аж.

ЭХ СУРВАЛЖ: BBC