Цар тахлын эсрэг дархлаа тогтоох вакцины гурав дахь тунг энэ сарын 30-наас буюу ирэх Даваа гаригаас хийхээр болсныг Эрүүл мэндийн сайд С.Энхболд мэдээлсэн. Тэрбээр "Манай улсад өнгөрсөн зургадугаар сарын 18 гэхэд альфа халдвар оргил үедээ хүрч, буурснаас хойш дельта хувилбар өслөө. Ирэх сарын дунд үе гэхэд халдварын тархалт дээд үедээ хүрнэ.

Нийт хүн амын 64 хувь нь вакцинаа хийлгэсэн. Гэвч эсрэг биеийн титрийн хэмжээ буурч байгаа тул дархлаа сэдээх нэмэлт тунг эхлүүлнэ. Энэ сарын 30-наас 55-аас дээш насныхан, боловсролын салбарынхан, дархлаа дарангуйлах эм уудаг хүмүүс, архаг хууч өвчтэй иргэдийг хамруулна.

Нийт 450000 хүнд сайн дурын үндсэн дээр гурав дахь тунг хийнэ. Мөн ирэх сард халдварын тоо эрс өсөх тооцоо гарсан тул энэ сард гурав дахь тунг хийж эхлэх шаардлагатай. Хэрэв багш, хүүхэд өвдвөл шинжилгээг тухайн сургуулийн бүх багш, хүүхдүүдээс авахгүй. Түүврийн буюу эмнэлзүйн шинж тэмдэг илэрсэн хүнээс л шинжилгээ авна.

Манай улс PCR-т тулгуурлан шинжилгээ хийж, дельта хувилбарыг илрүүлэх аргачлалыг нэвтрүүлсэн. Вакцины нөөц хангалттай, нийт 5 сая 730 мянган вакцин татан авсан. Тиймээс долоо хоног бүр хуваарь гарган, "Файзер" вакциныг гурав дахь тунд ашиглана. КОВАКС хөтөлбөрийн хүрээнд мөн "Файзер" вакцин хүлээж авна. Иймд гурав дахь тунг хийлээ гэхэд вакцины хомсдол үүсэхгүй" гэж мэдээлсэн билээ.

ХАЛДВАР АВСАН ИРГЭДЭД ГУРАВ ДАХЬ ТУНГ ХИЙХГҮЙ

Мөн манай улсад цөөн тооны иргэн "Спутник V" вакцин хийлгэсэн. Энэ вакцинтай холбоотой судалгаа бага байгаа учир иргэд гурав дахь тунгаа "Астразенека", "Файзер" вакцинаас сонгон хийлгэх юм байна. Нэмж хэлэхэд, халдвар авсан иргэд гурав дахь тунг хийлгэхгүй.

УОК-ын дэргэдэх Эрдэмтдийн зөвлөлийн Нарийн бичгийн дарга О.Батбаяр "Бусад орнуудад ч дельта вирус тархсаар байна. Нийт 215 сая хүн халдвар авсан. Сүүлийн долоо хоногт дэлхийн бүх улсад өвчлөл нэмэгдсэн. Дельта хувилбар зөвхөн Монгол төдийгүй бүх улсад тархсан. "Файзер", "Астразенека" вакцин тариулснаас хойш зургаа дахь сараас вакцины үр нөлөө буурч байна. Израильд гурав дахь тунгаа "Файзер" вакцинаар хийж байна. Оксфордын их сургуулийн хийсэн судалгаагаар гурав дахь тунг хийснээр үр дүнтэй байгаа нь харагдсан" гэсэн юм.