Газ хотын бүслэлтийг эсэргүүцэн жагссан Палестины иргэд Израилийн цэргүүдтэй мөргөлдсөний улмаас 24 энгийн иргэн шархадсан болохыг Газын эрүүл мэндийн яамнаас Бямба гаригт мэдээлэв. Улмаар, гэмтэж бэртсэн иргэдийн 10 нь хүүхэд байсныг тус яам мэдэгдэлдээ дурджээ. Тэр дундаа толгойдоо бэртэл авсан 13 настай Палестин хүүгийн биеийн байдал хүнд байгаа аж.

Израилийн арми “AFP” агентлагт энэ талаар мэдээлэхдээ "Газын зурвасын хашааг тойрон хэдэн зуун босогч, үймээн самуун дэгдээгчид цуглараад байна. Гэхдээ энэ бүсэд бэлтгэгдсэн цэргүүд байрлаж байгаа бөгөөд шаардлагатай тохиолдолд зэвсэг ашиглана" гэжээ.

Исламын шашинтнуудын гурав дахь ариун газар болох Иерусалимын Аль Акса сүмд гал дүрэлзсэний 52 жилийн ойд зориулан Хамас бүлэглэлийнхэн уг хөдөлгөөнийг зохион байгуулсан байна. Тодруулбал, 1969 оны наймдугаар сарын 21-ний өдөр Автралийн иргэн, Христ шүтлэгтэн Деннис Майкл Рохан уг сүмийг галдан шатаахыг оролдсон бөгөөд тухайн үеийн Израилийн засаг захиргаа хариуцлага тооцолгүй өнгөрчээ.

Өдгөөгөөс гурван сарын өмнө Израйль, Хамас бүлэглэлийн хооронд 11 хоног үргэлжилсэн мөргөлдөөн үүсч байв. Тус мөргөлдөөнөөр Израиль Газад агаарын цохилт өгч, Газаас Израиль руу пуужин харвасны эцэст өнгөрсөн тавдугаар сарын 20-нд талууд гал зогсоох шийдвэрт хүрсэн билээ. Израилийн цэргүүд Аль Акса сүмд дайралт хийсэн нь мөргөлдөөн үүсэх шалтгаан болжээ.

НҮБ -ын Хүмүүнлэгийн асуудлыг зохицуулах газраас мэдээлснээр мөргөлдөөний улмаас Газад 71,232 хүн орон гэргүй болж, 243 хүн амиа алдсан бол Израильд 13 хүн нас баржээ.

ЭХ СУРВАЛЖ: TRT WORLD