Хойд Солонгосын удирдагч Ким Жон Ун  Солонгосын дайнд амь үрэгдсэн хятад цэргүүдийн дурсгалд энэ Лхагва гаригт хүндэтгэл үзүүлж цэцэг өргөхийн ялдамд Бээжинтэй нягт харилцаатай байхыг эрмэлзэж байгаагаа илэрхийллээ. Тодруулбал, Ким Жон Ун Солонгосын дайн дууссаны 68 жилийн ойн баярыг тохиолдуулан тус дайнд амь эрсэдсэн Хятадын цэргүүдийн дурсгалыг хүндэтгэхээр найрамдлын цамхагт зочилсон нь 2011 онд удирдагчийн албыг авсанаас хойшхи гурав дахь тохиолдол аж.

1950-1953 оны хооронд хойгт хооронд өрнөсөн тус дайнд БНСУ-ыг АНУ ба өрнөдийнхөн, Хойд Солонгосыг ЗХУ, БНХАУ зэрэг коммунист орнууд дэмжиж байв. Ким Жон Ун цэцэг өргөх үеэрээ "Хойд Солонгос хамгийн хүнд хэцүү сорилтыг даван туулж байх үед Солонгосын ард түмний түүхэн тэмцэлд амь биеэ хайрлалгүй тусласан Хятадын ард түмний эрхэм сайхан сэтгэл үүрд дуурсагдах болно" гэсэн юм.

Ким Жон Уны тодорхойлсноор Хойд Солонгос өдгөө цар тахлын нөхцөл байдал, АНУ-ын авч хэрэгжүүлж буй хориг арга хэмжээ, өнгөрсөн жил болсон байгалийн гамшиг зэргээс үүдэн хамгийн хүнд хэцүү цаг үеийг туулж байна.  Тэрбээр өөрийн хамгийн дотно түнш БНХАУ-тай эдийн засгаа харилцаагаа сайжруулахыг хүсч байгаагаа илэрхийлжээ. Хойд Солонгос нь энэ долоо хоногийн эхээр өрсөлдөгч Өмнөд Солонгостой харилцаагаа сэргээхээр болж, 13 сарын дараа хил дамнасан холбооны сувгуудыг нээсэн юм.

Шинжээчдийн үзэж байгаагаар Хойд Солонгос эдийн засгийн нөхцөл байдлаа сэргээхийн тулд гадаад ертөнцтэй харилцаагаа сайжруулахыг зорьж байгаа гэсэн юм. Гэвч үүнээс өөр байр суурьтай байгаа хүмүүсийн хувьд Хойд Солонгосоос Сөүлтэй харилцаагаа сайжруулсан нь цөмийн зэвсгийн хэлэлцээнд АНУ-ыг буулт хийлгэхэд түлхэц үзүүлэх зорилготой аж. Пхеньян, Вашингтон хоёрын дунд удтал яригдаж буй цөмийн зэвсгийн хэлэлцээ нь одоогийн байдлаар зогсонги байдалд байгаа.

С.НАРАНГАРАВ

ЭХ СУРВАЛЖ: ASSOCIATED PRESS NEWS