Ах дүүс усанд живж нас барсан харамсалтай хэрэг гарчээ. Тодруулбал, Баян-Өлгий аймгийн Буянт сумын хоёрдугаар багийн нутагт байрлах Холбоо нуурын эрэгт байсан 21 настай иргэн, 10 настай дүүгийнхээ хамт живж нас барсан байна. Ослын дуудлага долдугаар сарын 26-ны өдөр аймгийн онцгой байдлын хэлтэст бүртгэгджээ. Энэ дагуу тэднийг тус өдрөөс эхлүүлэн хайжээ. Харамсалтай нь маргааш нь буюу 27-ны өдрийн өглөө тэдний цогцсыг Холбоо нуурын эргээс 10 орчим метрийн зайтай газраас олж, гарган авсан байна.

Иймд иргэд цаг агаарын мэдээг хэвлэл тогтмол хүлээн авч үер, усны аюулын талаар хүүхдэдээ анхааруулга, сэрэмжлүүлэг өгөх, хүүхдийг хараа хяналтгүйгээр гол мөрөн, нуур, цөөрмийн орчимд тоглуулахгүй, ганцааранг нь орхихгүй байх. Амралт аялал зугаалгаар явахдаа гол усанд хэт ойр байрлахгүй байх, гол үерлэсэн үед ус руу орох, сэлэхээс зайлсхийх, орон нутгийн малчид гол үертэй үед мал услахаар явахгүй байж өөрийгөө болон бусдын амь насыг эрсдэлд оруулахаас урьдчилан сэргийлэхийг холбогдох байгууллагаас зөвлөлөө.