Төрийн орон сууцны корпорацтай гэрээ байгуулан түрээсийн орон сууцанд оршин суудаг иргэдийн төлөөлөл өнөөдөр /2021.7.28/ төв талбайд мэдээлэл хийлээ. Тодруулбал, Хангай хотхон болон Буянт-Ухаа II хорооллын оршин суугчдын төлөөлөл Ерөнхий сайд болон Засгийн газарт шаардлага хүргүүлж байна.

Хангай хотхоны оршин суугч Э.Нэргүйцэцэг:

-Хангай хотхон, Буянт-Ухаа хорооллын зорилтот бүлгийн 800 гаруй өрхийн 6000 орчим иргэдэд тулгамдаж буй асуудлыг шийдвэрлэнэ гэж Засгийн газрын төлөөлөл ам гарсан. Гэвч өнөөдрийг хүртэл жил гаруй хугацаанд асуудалд хэн ч анхаарал тавьсангүй. Тиймээс Засгийн газарт дараах гурван шаардлагыг хүргүүлж байна. Үүнд:

Эхнийх нь Засгийн газрын 2016 оны 298 дугаар тогтоолоор “Бэрэн” ХХК-ий барьсан Хангай хотхон дахь 221 айлын орон сууцыг 15 тэрбум төгрөгөөр Засгийн газар худалдаж авах асуудлыг зохицуулж журамласан. Тухайн үед метр квадратын үнэтэй холбоотой зүйлийг тогтоолд дурдаагүй байсан. ТОСК болон түрээслэгчид иргэний хооронд байгуулсан орон сууц түрээслэх гэрээний хавсралтаар орон сууцны метр квадратыг нэг сая 280 мянган төгрөг хэмээн тусгасан байсан. Гэтэл өнөөдөр нэг сая 880 мянган төгрөг болгож нэмэгдүүлэх асуудал яригдаж байна.

Хоёрдугаарт 2017 оноос хойш түрээслэгчдийн төлсөн төлбөрийг орон сууцны урьдчилгаанд тооцохыг шаардаж байна.

Гуравдугаарт орлого багатай зорилтот бүлгийн иргэд, түрээсийн орон сууцаа 15 жилээр түрээслээд өмчлөх хүсэлтэй байгааг төр дэмжиж өгөхийг тус тус шаардаж байгаа юм.

Хэвлэлийн хурлын үеэр оршин суугчдын зүгээс Засгийн газарт тавьж буй дээрх шаардлагын хариуг наймдугаар сарын 5-ны дотор шийдвэрлэж өгөхийг хүслээ. Хэрэв ямар нэгэн хариу өгөхгүй бол цар тахлын дэглэмийг сахиж суулт зарлахаа мэдэгдсэн юм.