НЭМЭЛТ:

Олимпийн хүндийн өргөлтийн эмэгтэй 49 кг-ийн тэмцээн өнөөдөр явагдаж, аваргууддаа тодрууллаа. Хэдийгээр Монголын тамирчид өрсөлдөөгүй ч монгол шүүгч Л.Одгэрэл финалын шатыг шүүжээ. Харин энэхүү төрөлд Хятадын тамирчин Хоу Зжихуй 210 кг өргөж, олимпийн рекордыг шинэчлэн алтан медаль хүртсэн бол Энэтхэгийн тамирчин Чану Саихом Мирабаи 202 кг өргөж мөнгөн медаль, Индонезийн Уинди Кантика Аиза 194 кг өргөж хүрэл медаль тус тус хүртжээ.

Олон улсын жүдо бөхийн холбооноос /IJF/ “Токио-2020” олимпийн наадмын жүдо бөхийн тэмцээнийг шүүх шилдэг 16 шүүгчийг зарласны дунд Монгол Улсаас тус холбооны дэлхийн зэрэглэлийн шүүгч Төрбатын Энхцэцэг багтсан. Ийнхүү тэрбээр өдгөө Токио хотноо үргэлжилж буй олимпийн наадмын жүдо бөхийн тэмцээнийг шүүж байна.

 Т.Энхцэцэг нь Монголын спортын түүхэнд олимпийн наадам шүүх анхны эмэгтэй шүүгч болсон юм. Тэрбээр Энхцэцэг нь 1997 оноос хойш жүдогийн спорттой амьдралаа холбож яваа, жүдогийн шүүгч.

Жүдо бөхийн олимпийн зэрэглэлийн шүүгч Т.Энхцэцэг нь 2017 оноос IJF-ийн нийт 34 тэмцээн шүүсэн бөгөөд дэлхийн цуврал тэмцээнүүдээс гадна “Будапешт-2017”, “Баку-2018”, “Токио-2019” насанд хүрэгчдийн ДАШТ-ийг дэнсэлж, 2018 онд Монголын Үндэсний Олимпийн Хорооны Бөртэ Чоно наадмаас шилдэг шүүгчийн шагнал гардаж байлаа. Хэдийгээр тэрбээр 2020 оны гуравхан тэмцээнийг шүүж оролцсон ч түүний чансаа хэвээр хадгалагдсан нь мэргэжлийн ур чадвар, шударга шүүлттэй нь холбоотой биз ээ.