Теннис: Б.Болор-Эрдэнэ олимпоо өндөрлүүллээ

НЭМЭЛТ:

Ширээний теннисний эмэгтэй ганцаарчилсан төрөлд өрсөлдөж буй Б.Болор-Эрдэнэ нэгдүгээр тойргийн тоглолтоо Чили улсын тамирчин Паулиниа Вегатай хийж, дөрвөн ээлжийн тоглолтод 4-0 гэсэн харьцаатай харамсалтайгаар ялагдлаа. Ийнхүү Монгол ширээний теннисний баг тамирчдын хувьд Токио 2020 олимпийн наадам өндөрлөж байна.

Монгол Улс түүхэндээ анх удаагаа ширээний теннисний төрлөөр олимпод оролцсон нь энэ байв.

Олимпийн наадмын ширээний теннисний урьдчилсан шатны тоглолтууд өнөөдөр /2021.07.24/ өглөө 08:00 цагаас эхэлсэн. Монгол Улсаа төлөөлөн оролцож буй Б.Болор-Эрдэнэ эмэгтэйчүүдийн ганцаарчилсан төрөлд эхний ялалт байгуулсан бол эрэгтэй төрөлд оролцож буй Э.Лхагвасүрэн дөнгөж сая АНУ-ын тамирчин Нихил Кумартай тааран тоглож, 4-1 гэсэн харьцаатай ялагдал хүлээлээ.

Урьдчилсан шатаа давсан Б.Болор-Эрдэнэ эхний тойрогтоо Чилийн Паулиниа Вегатай учраа таарлаа. Хоёр тамирчны тоглолт өнөөдөр 18:30 цагаас явагдах хуваарьтай.

Ширээний теннисний эмэгтэйчүүдийн ганцаарчилсан төрөлд ур чадвараа сорьж буй Монголын багийн хамгийн залуу тамирчин Батмөнхийн Болор-Эрдэнэ Олимпийн наадмаас анхны хожлоо авлаа.

Б.Болор-Эрдэнэ 2002 оны арваннэгдүгээр сарын 12-нд төрсөн бөгөөд 18 настай.