Форекс арилжааг хөлбөмбөгт хийж буй Боруссиа Дортмунд | News.MN

Форекс арилжааг хөлбөмбөгт хийж буй Боруссиа Дортмунд

Форекс арилжааг хөлбөмбөгт хийж буй Боруссиа Дортмунд

Форекс арилжааг хөлбөмбөгт хийж буй Боруссиа Дортмунд

Сүүлийн үед залуучууд валют, хувьцаа арилжаалж, криптовалют худалдан авч хөрөнгөө эргэлдүүлж, их ашиг олохыг эрэлхийлэх болжээ. Тэгвэл үүнтэй яг ижил аргачлалаар Германы хөлбөмбөгийн Боруссиа Дортмунд баг ирээдүйтэй, авьяаслаг залуу хөлбөмбөгчдийг бага үнээр аваад эргүүлэн өндөр үнээр бусад багуудад зарж, үлэмж ашиг олж байна.

Ойрын жишээ л гэхэд Боруссиа Дортмунд 2017 онд Английн Манчестер Ситигээс Жэйдон Санчог найман сая фунтээр худалдан авч байв. Харин хэдхэн өдрийн өмнө Санчог Манчестер Юнайтед багт 73 сая фунтээр зарлаа. Ашиг нь 65 сая фунт.

Монголчуудын хэлдгээр моринд нүдтэй гэдэг шиг Боруссиа Дортмундад ирээдүйтэй залуу тоглогчдыг эрт илрүүлэх, таних чадвартай чадварлаг скаутууд олон бий. Тэдний нэг нь Свен Мислинтат. 11 жилийг Дортмундад өнгөрүүлсэн “Очир алмазан нүдэт” хочит тэрбээр олон гайхалтай залууг олж илрүүлсэн. Жишээлбэл, Польшоос Роберт Левандовскиг, Францаас Пьер-Эмерик Обамеянг, Усман Дембеле хоёрыг, Японоос Шинжи Кагаваг, Германаас Матс Хуммельсийг тус тус авчирч байв. Одоо эдгээр тоглогчид бүгд тив дэлхийд танигдсан одод.

2006 онд Боруссиа Дортмунд багийн санхүүгийн нөхцөл байдал хүндэрч, дэлхийн хэмжээний од тоглогчийг худалдан авч чадахгүй болсон учир залуу тоглогчдын эрэлд гарахаас өөр сонголтгүй болжээ. Энэ үед тус багт аналист хийж байсан Свен Мислинтат багийн скаутын албан тушаалд томилогдож, дэлхийгээр хэрэн хэсч тоглогчид олж ирэх үүрэг хүлээв.

Түүний олж авчирсан тоглогчдын үнийн мэдээлэл

НэрХудалдан авсан үнэЗарсан үнэАшиг
Пьер-Эмерик Обамеянг11.7 сая фунт57.4 сая фунт45.7 сая фунт
Усман Дембеле13.5 сая фунт112.5 сая фунт99 сая фунт
Шинжи Кагава350 мянган евро16 сая евро15.6 сая евро
Матс Хюммелс27.5 сая фунт31.5 сая фунт4 сая фунт

Роберт Левандовскиг Байерн Мюнхенд үнэгүй алдсаныг эс тооцвол Свен Мислинтатын авчирсан тоглогчид бүгд өндөр үнэд хүрч, багтаа ашиг оруулсан гэдэг нь харагдаж байна. Хэрэв тухайн үед Левандовскиг зарж чадсан бол зах зээлийн ханш нь 50 сая евро байлаа.

Скаутуудаас гадна Боруссиа Дортмундын залуучуудын багийн дасгалжуулагчид үүргээ сайн гүйцэтгэж байгаа. Тэд скаутуудынхаа олж ирсэн залуу тамирчдыг дэлхийн хэмжээний од болоход нь тусалж, арчилж торддог. Энэ талаар тус багийн залуучуудын багийн ахлах зохицуулагч Ларс Рикен “Бидний хийж, бүтээж буй зүйлс санаандгүй байдлаар эсвэл тохиолдлоор болоогүй. Бид супер оддыг худалдан авах бус бий болгох зорилго стратегитай. Усман Дембеле, Пьер-Эмерик Обамеянг хоёр анх манай багт ирэхдээ супер одод байгаагүй. Бид тэднийг супер од болтол нь хөгжүүлсэн юм. Энэ л манай багт чухал. Манай цэнгэлдэхийн уур амьсгал ч үүнийг нэг шалтгаан нь. Тамирчид, фэнүүд бие биенээ мэдрэх боломжтой. Фэнүүд маань ч үүнийг бэлэг гэж хардаг. Сүүлд л гэхэд хэдэн сайн залуу тоглогчид эгнээндээ элсүүлсэн. Холанд одоо 19 настай, Жо 17 настай. Тэднийг манай багт байгаад баярлаж байна” хэмээн ярьжээ.

Боруссиа Дортмунд үргэлж хурдтай тоглогчдыг багтаа элсүүлэхийг илүүд үздэг гэнэ. Энэ талаар Ларс Рикен “Техник, ур чадвар мэдээж чухал. Мөн хурдан шаламгай байдал, хурд хэрэгтэй. Манай үндсэн багийн тоглогчид бүгд хурдан. Хэдэн сарын өмнө бид хилийн чинадаас 17 настай нэг хүүг багтаа урьж бэлтгэл хийсэн юм. Харамсалтай нь, тэр хангалттай хурдан байж чадаагүй учир түүнийг нутаг буцаасан. Үүнээс гадна сэтгэл зүй чухал. Залуу тамирчид ачаалалтай байдаг. Тэд хичээлдээ явна, бэлтгэлээ хийнэ, шигшээ багтаа тоглоно. Долоо хоногт л 70-80 цаг завгүй гүйнэ шүү. Тэд ийм л багаасаа ачаалал даах чадвартай болж, сэтгэл зүйгээ сайтар бэлдэх хэрэгтэй. Бид ерөнхийдөө өөрсдийн хүүхдийн академиасаа болон ойролцоох хотуудаас залуу тамирчдыг дээш нь гаргах зорилготой байгаа. Мэдээж хилийн чинадад авьяаслаг залуу хүү байвал эрсдлийг нь үүрч, багтаа авчирна. Гэхдээ бид ихэвчлэн Америк, Англи эсвэл Испаниас 17, 19 настай залуу тоглогчид авчрахгүй байхыг илүүд үздэг” гэв.

Мөн тус баг залуу тамирчдынхаа нийгмийн асуудалд анхаарч сургууль болон ар гэрт нь асуудал гарвал зохицуулахыг хичээдэг аж. Бүр бэлтгэлийн бааз дээрээ хүртэл нийгмийн ажилтантай гэнэ.

Боруссиа Дортмундын фэнүүд “шар ханаараа” алдартай. Тус багийн зүгээс 2005 оноос хойш тамирчдаа 12 дугаартай тоглохыг хориглосон бөгөөд Боруссиа Дортмундын фэнүүд талбай дээрх 12 дахь тоглогч гэдэг утгаараа фэнүүдийнхээ дугаар болгосон аж.

Одоогийн байдлаар Боруссиа Дортмундын зараад буй хамгийн үнэтэй тамирчид.

НэрХудалдан авсан үнэЗарсан үнэАшиг
Усман Дембеле13.5 сая фунт112.5 сая фунт99 сая фунт
Жэйдон Санчо8 сая фунт73 сая фунт65 сая фунт
Кристиан Пулисичүнэгүй57.6 сая фунт57.6 сая фунт
П.Обамеянг11.7 сая фунт57.4 сая фунт45.7 сая фунт
Генрих Мхитарян24.8 сая фунт37.8 сая фунт13 сая фунт
Марио Готзе19.8 сая фунт33.3 сая фунт13.5 сая фунт
Матс Хуммельс27.5 сая фунт31.5 сая фунт4 сая фунт
Абду Диалло25.2 сая фунт28.8 сая фунт3.6 сая фунт
Илкай Гюндоган5 сая фунт24.3 сая фунт19.3 сая фунт
Пако Алькасер18.9 сая фунт20.7 сая фунт1.8 сая фунт
Юлиан Вайгль2.3 сая фунт18 сая фунт15.7 сая фунт
Нийт156.7 сая фунт494.9 сая фунт338.2 сая фунт

Наймаанд алдаж, онох үе бий. Ийм үе Боруссиа Дортмундад ч гарч байсан. Тодруулбал, Евро-2020 тэмцээнээр од болоод буй Шведийн Александр Исак гэх 21 настай хүүг Дортмунд ердөө 15 сая еврогоор зарж байв. Гэтэл одоо түүний зах зээлийн үнэ 40 сая евро болжээ. Мөн Италийн шигшээ багийн довтлогч Чиро Иммобилег 11 сая еврогоор зарсан. Харин одоо түүний үнэлгээ 38 сая евро.

Боруссиа Дортмундын нөөц дундрах болоогүй. Тэдэнд 130 сая еврогийн үнэлгээтэй, 20 настай Эрлин Холанд, 55 сая еврогийн үнэлгээтэй, 18 настай Жуд Беллингем, 38 сая еврогийн үнэлгээтэй, 18 настай Жованни Рейна, 18 сая еврогийн үнэлгээтэй, 16 настай Юссуфа Мукоко тэргүүтэй дараагийн үе нь бэлэн байна.

НэрХудалдан авсан үнэОдоогийн үнэАшиг
Эрлин Холанд20 сая евро130 сая евро110 сая евро
Жуд Беллингем23 сая евро55 сая евро32 сая евро
Жованни Рейнаүнэгүй38 сая евро38 сая евро
Юссуфа Мукокоүнэгүй18 сая евро18 сая евро

Зөв хөрөнгө оруулалт хийж, од болох чадавхтай тамирчдыг эрт илрүүлж чадсан нь Боруссиа Дортмундын амжилтын нууц. Цар тахлын үеэр дэлхийн томоохон хөлбөмбөгийн багууд алдагдал хүлээж, өр нь нэмэгдэж, тамирчдаасаа цалингаа хасахыг хүсч байхад Дортмунд ердөө 43.9 сая еврогийн алдагдлыг өнгөрсөн жил хүлээжээ. Энэ нь багийн ерөнхийлөгч Ханс-Йохим Ватзкег уурлуулсан бөгөөд учир нь тус баг 2011-2019 онуудын хооронд үргэлж ашигтай ажиллаж байжээ.

Та бүхний сайн мэдэх Барселонагийн өр 273 сая евро, Интер Миланы өр 277 сая евро, Ювентусын өр 335 сая евро, Манчестер Юнайтедын өр 450 сая евро, Тоттенхэм Хотспурын өр 589 сая евро.

Энэ мэдээнд өгөх таны сэтгэгдэл?
2
ГайхмаарГайхмаар
0
ЗөвЗөв
0
ХахаХаха
0
ХөөрхөнХөөрхөн
0
ХарамсалтайХарамсалтай
0
ТэнэглэлТэнэглэл
0
БурууБуруу
Баярлалаа!

Холбоотой мэдээ

3 сэтгэгдэл

News.mn сайтад сэтгэгдэл оруулахад анхаарах зүйлс

Avatar

Зочин 2021-07-07 66.181.189.165

Forex ooriin strategy tei bolhod hetsuuu 4-5 shaardagddag ymaa humuus amrhan gej bodood bna tiim bish mash ih tsag zav noir eruul mendee zoliosloj baij surdag zuil. Gol ni shantarj boldgui ym.

Avatar

Зочин 2021-07-07 202.126.88.162

Eniig forex arijlaa gedeg baih ni?

Avatar

Trader 2021-07-07 202.126.90.99

Hyamd av, undur zar erduu l ene shuu dee

NewsMN Гар утасны хувилбар Татах
NEWS.mn

Мэдээллийн эх сурвалж