Кентакигийн шарсан тахиа буюу "KFC" бол Азид, ялангуяа Хятадад хамгийн алдартай түргэн хоолны сүлжээ ресторан билээ. Анх 1987 онд Бээжинд нээгдэхдээ "KFC" баячуудын ордог тансаг газар байсан бол өдгөө бүх давхаргынхан үйлчлүүлж болохоор нээлттэй ресторан болжээ.

Хятад улс дахь "KFC" сүлжээ рестораныхан зар сурталчилгаа, харагдах байдал дээрээ онцгой анхаардаг билээ. Тэгэхдээ шинэ салбарын барилгыг тухайн орчны хэмнэл, архитектортай чадварлаг хослуулдаг нь хүмүүсийн сонирхлыг татдаг юм. Харин хамгийн сүүлд "KFC" шинэ салбарыг Өвөр Монголын Ордос хотын Далад хошууны цөлийн аялал жуулчлалын Шианшаван буюу дуут элс хэмээх бүсэд байгуулахдаа орчин, нөхцөл, цаг уурын байдалд зохицуулан монгол гэрээс санаа аван барьжээ.

Тус салбараар зочилсон хятад жуулчид тун сэтгэл хангалуун байна. Тэдний цахим орчинд нийтэлсэн зургуудаас харахад, тус салбар монгол гэр мэт хэлбэртэй, эсгий шиг цагааан өнгөтэй, бүслүүрийг дуурайсан улаан шугамтай, захиалга авах жижиг цонхтой. дээрээ KFC сүлжээ рестораны тэмдэгтэй, тэр тэмдгийг нь монгол бичиг болон хятад ханзаар мөн хөрвүүлэн бичсэн байх аж. Гэхдээ орчноосоо болоод сууж үйлчлүүлэх хэсэг үгүй гэнэ. Тиймээс үйлчлүүлэгчид захиалгаа авч яваад, жуулчны баазад амарч буй өрөөндөө орж идэх учиртай аж.

Эх сурвалж: WHATSONWEIBO