Ихэнх нутгаар долдугаар сарын 5-ныг хүртэл аадар бороо орох төлөвтэй байгаа талаар Цаг уур, орчны шинжилгээний газраас мэдээлсэн. Их хэмжээний борооны улмаас нийслэлийн авто замууд усанд автаж, иргэд гуталтайгаа туулахаас өөр сонголтгүй болжээ. Жил бүр 1-2 тэрбум төгрөгийг авто замын гадаргуугийн ус зайлуулах шугам сүлжээнд төсөвлөдөг хэдий ч тэрхүү мөнгөөр ямар бүтээн байгуулалт хийдэг болохыг мэддэггүй талаар иргэд хэлж байв.

Бид түр зуурын аадар борооны улмаас аль хэсгүүдэд ус их хэмжээгээр тогтсон, зорчих хэсэгт ямар хүндрэл учирсан талаар мэдээллийг бэлтгэлээ. Хотын төв хэсэг буюу их дэлгүүрийн зүүн талын авто замын явган хүний гарц дээр ус тунасан учир явган зорчигч явах боломжгүй болжээ. Мөн Баруун дөрвөн замын уулзвараас Барс явах чиглэлд машины дугуйн тал хүртэл борооны ус тогтсон байв. Иргэдийн хэлж буйгаар тухайн хэсэгт бороо орох бүрд ус тогтдог ч нийслэлээс ус зайлуулах шугам хоолой нэмж тавьдаггүй. Хороо, дүүрэгтээ хандахаар манайх мэддэггүй гэсэн тайлбар өгдөг гэв.

Геодези, усны барилга, байгууламжийн газрын ерөнхий инженер С.Батсайханаас энэ талаар тодруулахад "Чингэлтэй, Сүхбаатар, Баянзүрх зэрэг дүүрэгт хүн амын нягтаршил ихэссэнээр гадаргын ус зайлуулах шугам сүлжээний ачаалал нэмэгдэж байна. Нөгөө талаар насжилтын асуудал яригдана. Жил бүр тодорхой хэмжээний төсөв батлагддаг хэдий ч урсгал зардал болон цэвэрлэгээний ажилд зарцуулагддаг. Түүнээс нийслэлээс баталсан нийт төсвөөр гадаргуун ус зайлуулах шугам сүлжээ хийнэ гэж төлөвлөх боломжгүй. Нийслэлийн хэмжээнд 850 км авто зам байдаг ч төлөвлөлтийн дагуу 184 км замд л ус зайлуулах шугам сүлжээний инженерчлэлийн ажил хийгдсэн. Ус зайлуулах шугам сүлжээний цэвэрлэгээний ажил тогтмол хийгдэж байна” гэв.

Нийслэлийн замын сангийн хөрөнгөөр өнгөрсөн онд авто замын борооны ус зайлуулах шугам сүлжээний өргөтгөл, нөхөн сэргээлтийн ажилд хоёр тэрбум төгрөг төсөвлөгдсөн. Харин 2021 онд нэг тэрбум төгрөг төсөвлөгдөөд байгаа аж.

Энэ төсөвлөгдсөн мөнгөөр хийгдсэн ажлын үр дүнг нийслэлд орсон борооны зураглал харуулж байна. "Дүнжингарав" худалдааны төвийн уулзвар, Баруун дөрвөн замын урсгал, Баянмонгол хорооллын баруун хойд талын нүхэн гарц гээд усанд автсан хэсгүүдээр явган бүү хэл автомашинтай хүн зорчиход ч хүндрэлтэй байгаа юм. Тиймээс иргэд "Батлагдсан төсвөө зориулалтын ажилдаа зарцуулдаг эсэхэд эргэлзэж байна" хэмээн хэллээ.