Үйл ажиллагаа нь зогсонги байдалд ороод буй аж ахуй нэгжүүдийн төлөөллүүд өнөөдөр/2021.06.28/ Сүхбаатарын талбай дээр “Тэвчээр тасарлаа” гэх уриан дор флашмоб хийлээ. Тэдний зүгээс Монгол Улсын Засгийн газар, УОК, НОК, Нийслэлийн засаг даргад дөрвөн шаардлагыг хүргэж байна. Тухайлбал,

• Нэг болон хоёрдугаар тунгийн вакцинд хамрагдсан иргэдэд үйлчлэх эрхийг ялгаваргүй олгох,
• Үргэлжлүүлэн үйл ажиллагааг нь зогсоовол төрөөс нөхөн олговор олгох,
• Үйл ажиллагаа явуулах зөвшөөрлийн хугацааг үнэ төлбөргүй, ямарваа дарамт шахалтгүйгээр сунгаж өгөх,
• УОК, НОК-той хамран ажиллах зэрэг дөрвөн шаардлагыг тавьж байгаа аж.

Иргэн Д.Амартүвшин:

-PC-ийг яагаад хаагаад байгааг ойлгохгүй байна. 1024 бөх барилдуулах, PC-нд хоёр компьютерийн зайтай хүн суулгах ялгаатай шүү дээ. Ресторанд ч гэсэн архи, дарсаар үйлчилдэг. Бар ямар ч ялгаагүй. Гагцхүү ажиллах цаг нь л өөр. Шаардлагын хариу өгөхгүй бол дараа долоо хоногийн Даваа гаригт энэ талбай дээрээ шоронд ороод, торгуулаад ч хамаагүй жагсаал хийнэ. Бид нар хоолныхоо төлөө тэмцэхгүй бол өөр хэн тэмцэх юм бэ? Дараа долоо хоногт шаардлага биелүүлэхгүй бол бид энхийн бус яг жагсаал цуглаанаар тэмцэнэ. Ямар ч ойлгомжгүй хөл хориог чинь бид удаан тэвчлээ.

Зохион байгуулагч н.Тамираа:

-Цөөхөн газар нээхээр тэнд төвлөрөл үүсээд байна. Тиймээс бүх газраа ялгаварлан гадуурхахгүй нээх хэрэгтэй. Бид 2020 оны нэгдүгээр сараас хойш ажиллаагүй. Гэтэл Монгол банкны хар жагсаалтанд оруулчихсан. Долдугаар сарын 1-нээс өмнө өр төлбөрөө төлвөл хар жагсаалтаас гаргана гэж байна. Бид ажиллаагүй байж ямар мөнгөөрөө өр төлбөрөө төлөх юм бэ?