Монгол Улсын Ерөнхийлөгч У.Хүрэлсүх өнгөрсөн Баасан гаригт тангаргаа өргөж, Тамгын газрын бүтцийн томилгоогоо хийсэн. Түүний үргэлжлэл болгож, зөвлөхүүдээ томилж эхэлжээ.

Ерөнхийлөгчийн Тамгын  газрын дүрэмд зааснаар Ерөнхийлөгч зөвлөхүүдтэй байх бөгөөд Ерөнхийлөгчийн зарлигаар томилж, чөлөөлөгддөг.

Ерөнхийлөгч:

• Улс төр, цэргийн бодлого
• Хуулийн бодлого
• Эрдэс баялаг, эрчим хүч, дэд бүтцийн бодлого
• Гадаад харилцааны бодлого
• Үндэсний аюулгүй байдлын бодлого
• Хүний эрх, иргэний оролцооны бодлого
• Төсөв, мөнгө, татварын бодлого
• Олон нийтийн харилцаа, нийтлэг бодлого
• Хот, хөдөөгийн хөгжлийн бодлого
• Эрүүл мэнд, боловсрол, шинжлэх ухаан, технологийн бодлого, шашны асуудал
• Байгаль орчин, амьдрах орчны бодлого
• Хөгжлийн эдийн засаг, хөдөлмөр эрхлэлтийн бодлого гэсэн зөвлөхүүдтэй байна.

Мөн Ерөнхийлөгч орон тооны бус зөвлөхүүдтэй байдаг.

• 8.4.1. Орон тооны бус зөвлөхүүдийг Ерөнхийлөгч томилж, чөлөөлнө.
• 8.4.2. Орон тооны бус зөвлөхүүд нь Ерөнхийлөгчийн зөвлөлийн хуралд шаардлагатай асуудлаар урилгаар оролцож болно.

Монгол Улсын Ерөнхийлөгч нь орон тооны болон орон тооны бус зөвлөхүүдтэй байдаг. Тэгвэл Ерөнхийлөгч У.Хүрэлсүх зөвлөхүүдээ томилж эхэлсэн бөгөөд Т.Мөнхсайхан Эрүүл мэнд, спорт, нийгмийн бодлогын зөвлөх, Хууль эрх зүйн бодлогын зөвлөх А.Бямбажаргалыг, Эдийн засгийн бодлогын зөвлөх Б.Даваадалай, Гадаад бодлогын зөвлөх Э.Одбаяр, С.Лүндэг,  МУИС-ийн багш Ч.Лодойравсал, МУИС-ийн нийгэм соёлын анторопологийн танхимын эрхлэгч Д.Бум-Очир нар зөвлөхөөр томилжээ.

ЕРӨНХИЙЛӨГЧИЙН ЗӨВЛӨХҮҮДИЙН CV

Ерөнхийлөгчийн ахлах зөвлөх буюу Хүний эх, иргэний нийгэм, залуучуудын бодлого хариуцсан зөвлөхөөр С.Лүндэгийг томилжээ. Тэрбээр Ерөнхийлөгч У.Хүрэлсүхийг Шадар сайд байхаас нь эхлэн Шадар зөвлөх, туслахаар нь өдийг болтол ажиллаж ирсэн юм.

С.Лүндэг нь 1982 онд Улаанбаатар хотод төрсөн. Нийслэлийн 52-р дунд сургуульд 1989-1999 онд суралцаж, улмаар ШУТИС-ийн КТМС-ийн Компьютерийн инженерийн ангийг 2004 онд төгссөн. Их сургуулиа төгссөн жилээ Япон Улсын Саппоро хотын Саппорогийн Олон Улсын Япон хэлний институтад 2 жил суралцаж төгссөн. Ажлынхаа анхны гарааг 2006 онд Монгол Улсын Их Хурлын Тамгын газарт Их Хурлын гишүүн, МАН-ын  даргын туслахаар ажиллаж эхлүүлж байсан бол 2010 оноос УИХ-ын гишүүний зөвлөхөөр ажилласан. УИХ-ын Тамгын газарт ажиллаж байгаад мэргэжлээ дээшлүүлэхээр 2012 онд Америкийн Нэгдсэн Улсын Вержиня мужийн Страйерийн Их сургуульд магистрт суралцаж байгаад 2014 онд Япон Улсын Саппоро хотын Саппорогийн Олон Улсын Их сургуульд шилжин суралцаж байгаад тодорхой шаардлагын улмаас чөлөө авсан юм.

2014 оны арванхоёрдугаар сараас Монгол Улсын Шадар сайд У.Хүрэлсүхийн Шадар туслах, 2017 оноос Монгол Улсын Ерөнхий сайд У.Хүрэлсүхийн Шадар туслах, 2020 оны нэгдүгээр сараас Ерөнхий сайдын зөвлөхөөр ажиллаж байна. Төрийн ажил хийхээс гадна Монгол Адын намын Бага хурлын гишүүнээр ажиллаж буй. Эхнэр хүүхдийн хамт амьдардаг.

Ерөнхийлөгчийн Хууль эрх зүйн бодлогын зөвлөх А.Бямбажаргал нь 1991-2001 онд Д.Сүхбаатарын нэрэмжит 2 дугаар сургууль, 2002-2007 онд Монгол Улсын их сургуулийн Хууль зүйн сургуулийг Эрх зүйч мэргэжлээр төгсөж, 2007-2009 онд Монгол Улсын их сургуулийн Хууль зүйн сургуульд Хууль зүйн ухааны магистрын зэрэг хамгаалсан. Хууль зүйн ухааны доктор.

• 2007-2009 онд МУИС-ийн Хууль зүйн сургуульд захирлын туслах, Гадаад харилцааны мэргэжилтэн,
• 2007-2021 онд МУИС-ийн Хууль зүйн сургуулийн Нийтийн эрх зүйн тэнхимийн дадлагажигч багш, ахлах багш, Дэд профессор,
• 2017-2021 онд Хууль зүйн сургуулийн дэд захирал, эрдэмтэн, нарийн бичгийн даргаар тус тус ажиллаж байсан.

Ерөнхийлөгчийн эдийн засгийн бодлогын зөвлөх Б.Даваадалай нь 2007 онд Монгол Улсын их сургуулийн Эдийн засгийн сургуулийг Банкны эдийн засгийн мэргэжлээр төгсөж, АНУ-ын Нью Йорк хотын Колумбын их сургуульд Эдийн засгийн ухааны магистрын зэрэг, 2021 онд Монгол Улсын их сургуулийн Бизнесийн сургуульд докторантын зэрэг тус тус хамгаалсан.

• 2007-2014 онд Монгол банкны Мөнгөний бодлого, судалгааны газарт эдийн засагч,
• 2013-2014 онд Дэлхийн банкны төв оффисын Зүүн Өмнөд Ази, Номхон далайн бүс нутгийн багт зөвлөх,
• 2015-2021 онд Дэлхийн банкинд эдийн засагч,
• 2021 онд Монгол Улсын Засгийн газрын гишүүн, Сангийн сайдын зөвлөхөөр тус тус ажилласан.
• 2009 онд ХБНГУ-ын төв банкны “Улирлын зохицуулалт хийх арга зүй” сэдэвт сургалт,
• 2010 онд Швейцарын Холбооны Улсын төв банкны сургалтын төвд “Инфляцийн таамаглал болон мөнгөний бодлого” сэдэвт сургалт,
• 2011 онд Олон улсын валютын сангийн Санхүүгийн програмчлалын сургалт,
• 2012 онд Олон улсын валютын сангийн Макро эдийн засгийн төсөөллийн сургалтад тус тус хамрагдсан.

Ерөнхийлөгчийн гадаад бодлогын зөвлөх Э.Одбаяр нь 1988-1992 онд Хосе Мартын нэрэмжит 52 дугаар дунд сургууль, 1992-1993 онд ХБНГУ-ын Дрезден хотын 37 дугаар бага сургууль, 1993-1995 онд ХБНГУ-ын Дрезден хотын 36 дугаар дунд сургууль, 1995-1998 онд ХБНГУ-ын Дрезден хотын Бертольт Брехтийн нэрэмжит гимнази, 1998-1999 онд ХБНГУ-ын Лайпциг хотын Штуудийн коллежийг төгсөж, 1999-2006 онд ХБНГУ-ын Дрезден хотын Техникийн их сургуулийг Америк судлал, философи, нийгэм, эдийн засгийн түүх чиглэлээр Олон улсын харилцааны магистрын зэрэг хамгаалсан. Итгэмжит дипломат цолтой. Англи, франц, герман, орос хэлтэй.

• 2006-2007 онд Гадаад харилцааны яамны Европын газарт мэргэжилтэн,
• 2007-2009 онд Гадаад харилцааны яамны Европын газарт Атташе,
• 2007-2009 онд Гадаад харилцааны яамны Европын газарт Монгол-Европын Холбооны Хамтын ажиллагааны хамтарсан хорооны Нарийн бичгийн дарга,
• 2009-2011 онд Монгол Улсаас ХБНГУ-д суугаа Элчин сайдын яамны 3 дугаар Нарийн бичгийн дарга,
• 2011-2012 онд Монгол Улсаас ХБНГУ-д суугаа Элчин сайдын яамны 1 дүгээр Нарийн бичгийн дарга,
• 2012 онд Гадаад харилцааны яамны Америк-Африкын газарт 1 дүгээр Нарийн бичгийн дарга,
• 2012-2018 онд  Гадаад харилцааны яамны Далайд гарцгүй хөгжиж буй орнуудын олон улсын судалгааны төвийн Захирлын үүрэг гүйцэтгэгч,
• 2016-2018 онд Гадаад харилцааны яамны Тусгай үүрэг гүйцэтгэгч Элчин сайд,
• 2018-2021 онд Далайд гарцгүй хөгжиж буй орнуудын олон улсын судалгааны төвийн Гүйцэтгэх захирлаар тус тус ажиллаж байсан.

Ерөнхийлөгчийн Боловсрол, шинжлэх ухаан, технологийн бодлогын зөвлөх Ч.Лодойравсал нь 1993-1995 онд Монгол Улсын их сургуулийн Төрөлжүүлсэн тусгай сургалттай сургууль, 1995-1999 онд Монгол Улсын их сургуулийг Электроникийн инженер мэргэжлээр төгсөж, 1999-2001 онд Монгол Улсын их сургуульд Физикийн ухааны магистрын зэрэг хамгаалсан. Техникийн ухааны докторын зэрэгтэй, Монгол Улсын их сургуулийн дэд профессор.

• 1998-1999 онд “М-Си-Эс Электроникс” ХХК-ийн Дохиолол, автоматжуулалтын хэлтэст инженер,
• 1999-2000 онд “М-Си-Эс Интернэйшнл” ХХК-ийн Эрчим хүчний хэлтэст инженер,
• 2000-2001 онд “М-Си-Эс Электроникс” ХХК-ийн Автоматжуулалтын хэлтэст ахлах инженер,
• 2001-2002 онд МУИС-ийн Физик электроникийн сургуулийн Электроникийн тэнхимд дадлагажигч багш,
• 2002-2006 онд МУИС-ийн Мэдээллийн технологийн сургуулийн Электроникийн сургуульд багш,
• 2006-2008 онд МУИС-ийн Мэдээллийн технологийн сургуулийн Электроникийн тэнхимийн Эрхлэгч,
• 2008-2014 онд МУИС-ийн Мэдээллийн технологийн сургуулийн захирал,
• 2014-2019 онд МУИС-ийн Хэрэглээний шинжлэх ухаан, инженерчлэлийн сургуулийн дэд профессор,
• 2019-2021 онд МУИС-ийн дэд захирлаар тус тус ажиллаж байсан.

Ерөнхийлөгчийн Соёл, шашны бодлогын зөвлөх Д.Бум-Очир нь 1993-1996 онд Монгол хэл, бичгийн дээд сургуулийг Монгол-англи хэлний багш мэргэжлээр, 1996-1997 онд Монгол Улсын их сургуулийн Гадаад хэл, соёлын сургуулийн герман хэлний курс төгссөн.

1996-1998 онд ХБНГУ-ын Боннын их сургууль болон Монгол Улсын их сургуулийн Монгол хэл, соёлын сургуульд Хэлбичгийн ухааны магистрын зэрэг, 1998-2000 онд Монгол Улсын Шинжлэх ухааны академийн Хэл зохиолын хүрээлэнд Хэлбичгийн ухааны докторын зэрэг, 2000-2001 онд ИБУИНВУ-ын Кэмбрижийн их сургуульд Нийгэм-соёлын антропологийн магистрын зэрэг, 2002-2006 онд ИБУИНВУ-ын Кэмбрижийн их сургуульд Антропологийн ухааны докторын зэргийг тус тус хамгаалсан.

• 1996-1998 онд Монгол хэл, бичгийн дээд сургуульд Англи хэл, монгол аман зохиол, монгол эртний уран зохиолын багш,
• 1998-2001 онд МУИС-д Ардын билиг зүй, эртний уран зохиолын багш,
• 2001-2002 онд МУИС-ийн Антропологи болон археологийн тэнхимийн дэд профессор,
• 2006-2008 онд МУИС-ийн Нийгэм-соёлын антропологийн тэнхимийн профессор,
• 2008-2009 онд МУИС-ийн Нийгэм-соёлын антропологийн тэнхимийн профессор ба Орлогч эрхлэгч,
• 2006-2012 онд Нээлттэй нийгмийн хүрээлэнгийн эрдмийн тэтгэлгийн судлаач,
• 2010-2015 онд МУИС-ийн Нийгэм-соёлын антропологийн тэнхимийн профессор ба Эрхлэгч,
• 2014-2015 онд ИБУИНВУ-ын Кэмбрижийн их сургуулийн Монгол ба Дотоод Ази судлалын төвийн зочин судлаач,
• 2015-2019 онд ИБУИНВУ-ын Лондон коллеж их сургуулийн Антропологийн тэнхимийн “Шинэ эдийн засагт үүсэж буй сэдвүүд” төслийн судлаач,
• 2021 онд Монгол Улсын Засгийн газрын гишүүн, Соёлын сайдын ахлах зөвлөхөөр тус тус ажиллаж байсан.

Ш.ЧИМЭГ