ОХУ-аас Монгол Улсын 50 иргэн Алтанбулаг боомтоор хил нэвтэрч, эх орондоо иржээ. Тэднийг татан авах ажиллагааг Гадаад харилцааны яам зохион байгуулсан байна. Тус яам нь ОХУ-аас эх орондоо буцах хүсэлтэй иргэдийн хүсэлтийг тогтмол хүлээн авч, УОК-оор дамжуулан шийдвэрлэж байгаа юм. Ингэхдээ өргөдөл, хүсэлтийг ОХУ дахь Элчин сайдын яам болон, ар гэрийнхэн нь УОК-ын Шуурхай штабт хүргүүлэх боломжтой.

Хилээр нэвтэрч, эх орондоо ирэх иргэдийн хүсэлтийг шийдвэрлэхдээ вакцины бүрэн тунд хамрагдаж 14 хоносон болон сүүлийн дөрвөн сарын хугацаанд Covid-19 халдвар авч эмчлүүлж эдгэсэн байх шалгуурыг харж байгаа юм.

Мөн вакцин хамрагдаагүй иргэдийг долоо хоног тусгаарлах байранд тусгаарласны дараа дахин долоо хоног гэрийн ажиглалтад шилжүүлэх журмыг мөрдөж буй. Гадаад харилцааны яамны мэдээлснээр вакцинд хамрагдаагүй иргэд ОХУ-аас ирэх тохиолдолд тусгаарлах байрны хүрэлцээ хангамжаас шалтгаалан иргэдийг нэгдсэн байдлаар татан авч байгаа аж.