Монгол Улсын Ерөнхийлөгч Х.Баттулгын бүрэн эрхийн хугацаа өнөөдөр /2021.06.25/ дуусч байна. Тэрбээр буухынхаа өмнө 13 хүнд уучлал үзүүлсэн бөгөөд түүний дотор Тагнуулын ерөнхий газрын дарга асан Б.Хурц, УИХ-ын гишүүн асан Д.Дамба-Очир нар багтжээ. Ингэснээр Ерөнхийлөгч Х.Баттулга ЖДҮХС-ийн зээлийн асуудлаар ял аваад байсан МАН-ын хоёр ч ЖДҮ-чинд уучлал үзүүлэв.

УИХ-ын гишүүн асан Д.Дамба-Очир шүүхээс 3,6 жилийн хорих ял оноосон бөгөөд хамгийн сүүлд Улсын дээд шүүх 2021 оны дөрөвдүгээр сарын 21-нд түүний хэргийг хэлэлцээд 3,6 жилийн ялыг нь хэвээр үлдээгээд байсан юм. Түүний хувьд Жижиг, дунд үйлдвэрлэлийг хөгжүүлэх сан /ЖДҮХС/-гаас “Сапфир стоун” ХХК-д 1.2 тэрбум төгрөгийн зээл авахад нь нөлөөлсөн үндэслэлээр буруутгаж, гэм буруутай гэж үзсэн юм. Харин УИХ-ын гишүүн асан Г.Солтаны хувьд ЖДҮХС-гаас хамаарал бүхий компанидаа 950 сая төгрөгийн зээл авсан нь батлагдаж, гурван жилийн хорих ял сонсон эдэлж байсан бөгөөд 2021 оны гуравдугаар сард Ерөнхийлөгч Х.Баттулга уучлал үзүүлснээр суллагдсан юм.

Ш.ОЧ