Израил улс хувцас загвар, гоёлын зориулалтаар ангийн арьс, үс худалдахыг хориглосон анхны улс болж байгааг тус улсын Экологийн сайд Гила Гамлиэль мэдэгджээ. Энэхүү хориг энэ оны арванхоёрдугаар сараас хүчин төгөлдөр болох бөгөөд ангийн үсийг шашин, шинжлэх ухаан, боловсролын зорилгоор ашиглахыг зөвшөөрөх юм байна.

Өмнө нь уг шийдвэрийг гаргах оролдлого удаа дараа хийж байсан ч улс төрийн хүчнүүд болон шашны асуудлаас болж ажил хэрэг бололгүй хойшилсоор байсан юм.

Израилд Шаббат болон баярын өдрүүдээр булга, үнэгний сүүлтэй малгай өмсдөг еврейчүүд ангийн арьс, үс ихээр худалдаж авдаг байна. Амьтны эрхийг хамгаалах “PETA” байгууллага Израил улсын хоригийг "түүхэн шийдвэр" гэж онцолжээ.

Хэдий худалдаанд хориг тавиагүй ч арьс, үсийг нь зарж борлуулах зорилгоор амьтан үржүүлэхийг хориглосон хэд хэдлэн улс бий. Тухайлбал, Их Британи улс хамгийн анх 2000 онд хориглож, дараа нь 2004 онд Австри улс арьс, үсийг нь зарж борлуулах зорилгоор амьтан үржүүлэхийг хориглож байв. Үүний дараа 2012 онд үслэг эдлэлээрээ алдартай Нидерланд улс амьтны үс, арьсыг ашиглах зорилгоор амьтан үржүүлэхийг хориглож, 2024 он хүртэл булганы үс үйлдвэрийг бүрэн зогсоосон юм.

Эх сурвалж: Times of Israel