БНХАУ-ын Тяньжин боомтод вагон захиалгад орсон 72 галт тэрэг буюу 4000 орчим чингэлэг бөөгнөрөөд буй. Энэ нь цар тахлаас үүссэн нөхцөл байдал, Хятадаас экспортын чиглэлд их хэмжээний ачаа бараа гаргах шаардлага, Европын чиглэл рүү явах төмөр замын тээвэрлэлтийн эрэлт нэмэгдсэн гэх мэт олон асуудлаас үүдэлтэй ажээ.

Монголын тээвэр зуучлагчдын нэгдсэн холбооноос Хятадын Тяньжин боомт дээр нийт 3162 чингэлэг саатаж, бөөгнөрөл үүссэн асуудлыг яаралтай шийдвэрлэж өгөх тухай хүсэлтийг холбогдох байгууллагуудад гаргасан байна.

Монголын талаас Тяньжин боомтод үүсээд байсан ачаа тээврийн бөөгнөрлийг шийдэх асуудлыг Хяталын талд тавьсан. Үүнтэй холбогдуулан Хятадын тал боомтод хуримтлагдсан чингэлгийг яаралтай горимоор тээвэрлэхээр шийдвэрлэж, галт тэрэгний тоог нэмэгдүүлэхээр болсон байна.

Гадаад харилцааны яамнаас мэдээлснээр, Тяньжин боомтоос эхтэй импортын чингэлгийн дөрвөн галт тэргийг Замын-Үүд өртөөнд хүлээн авчээ. Өнөөдрийн байдлаар дахин зургаан галт тэрэг Эрээн өртөөг чиглэн замдаа яваа тухай Хятадын төмөр замын байгууллагаас мэдээлсэн байна.