Аргентин улсын Ерөнхийлөгч Альберто Фернандес өчигдөр /2021.06.09/ Испани улсын Ерөнхий сайдтай Буэнос Айрес хотод уулзахдаа өөрийн хөрш орны талаар таагүй үг хэлсэн нь шүүмжлэл дагуулжээ.

Тэрбээр Испанийн Ерөнхий сайд Педро Санчест өөрийн улсыг Европ тивтэй илүү ойр хэлхээ холбоотой гэж тайлбарлахдаа “Мексикчүүд бол Индиан гаралтай. Бразилчууд ширэнгээс гаралтай. Харин Аргентинчууд бид бол Европоос ирсэн хөлөг онгоцноос газардсан хүмүүс” гэж хэлсэн нь хөршүүдийнх нь дургүйцлийг хүргэсэн байна.

Аргентины Ерөнхийлөгчийн хайхрамжгүй хэлсэн үг цахим сүлжээнд хурдацтай тарж, нэлээд дуулиан дэгдээсэн байна. Удалгүй Фернандес твиттер хуудаснаа уучлал гуйсан мэдэгдэл гаргаж, хэнийг ч гомдоохыг хүсээгүйгээ илэрхийлжээ.

Фернандес дээрх үгийг Аргентины дуучин, хөгжмийн зохиолч Лито Неббиагийн нэгэн дууны үгнээс санаа аван хэлсэн байна. Тэр өмнө нь Литогийн үнэнч шүтэн бишрэгч гэдгээ хэдэнтээ ярьж байжээ.

Аргентины зарим иргэд ерөнхийлөгчийнхөө хэлсэн бодлогогүй үгнээс ичиж байгаагаа сошиал сүлжээнд илэрхийлээд өмнөөс нь Мексик, Бразилын ард иргэдээс уучлал гуйсан байна.

Эх сурвалж: BBC