"НЭГ НАМЫН НОЁРХЛЫН ЭСРЭГ СӨРӨГ ХҮЧИН БОЛЖ АЖИЛЛАНА"

Найм дахь удаагийн Ерөнхийлөгчийн сонгууль үр дүн нь тодорхой, нам гүм сонгууль болсон гэж сонгогчдын зарим нь шүүмжилж буй. Энэ талаар ХҮН-ын Удирдах зөвлөлийн дарга Т.Доржханд “Монголчууд бид Үндсэн хуулийн нэмэлт өөрчлөлтийн хүрээнд анх удаа зургаан жилээр сонгогдох  Ерөнхийлөгчийн сонгуулиа амжилттай зохион байгууллаа. Энэ удаагийн сонгууль өмнөх 30 жилд болж байсан сонгуулиас маш ялгаатай болсон гэж бид дүгнэж байна. Ямар нэгэн байдлаар бие биенээ харлуулж  гүтгэсэн сонгууль болоогүй. Хоёрдугаарт маш их зардал багатай сонгууль боллоо”  гэсэн юм.

Мөн ХҮН-аас эрх баригч намын эсрэг сөрөг хүчин болж ажиллана гэдгээ илэрхийлэв. Шаардлагатай тохиолдолд  Ардчилсан нам болон бусад намтай тодорхой зүйл дээр хамтран ажиллана гэдгээ мэдэгдлээ. Энэ талаар тус намын УЗ-ийн дарга Т.Доржханд хэлсэн үгэндээ  “Нэг намын тогтолцоотой 1990 он руу ухарсан гэж харж байна. Иймд намын хүчний харьцааг тэнцвэржүүлэх нь улс төрийн намуудын үүрэг болов уу. ХҮН бол хүчээ хуримтлуулж иргэдийн төлөөлөл болж ажиллана. УИХ-д бид ганц суудалтай нь үнэн ч бодлогын түвшинд парламент, Засгийн газарт байр сууриа илэрхийлэх болно. Ардчиллынхаа талд зогсоно. Тэнцвэртэй орчныг бүрдүүлэхэд өөрсдөөс шалтгаалах бүх зүйлийг хийнэ. Шаардлагатай бол  Ардчилсан нам болон бусад намтай тодорхой зүйлүүд дээр хамтарна. Бидний хувьд ажил дөнгөж эхэлж байна. Эрх барьж буй намыг зөв зүйлд нь дэмжиж, буруудвал хатуу шүүмжилнэ” хэмээн онцолсон.

Тэрбээр Ерөнхийлөгчийн 2021 оны сонгуулийн санал хураалтад залуус идэвхгүй оролцсон нь цахим орчныг ашиглаж чадаагүйтэй холбоотой хэмээн шүүмжлэв. Энэ тухай ярихдаа “ Монголд хүн бүр ухаалаг утас ашигладаг. Интернет хэрэглээгээрээ бид дэлхийд дээгүүрт жагсдаг. Гэтэл бид цаг үеэ мэдрээгүй, хөгжил дэвшлээс хоцорсон сонгууль боллоо гэж дүгнэж байна. Залуусын дийлэнх нь сонгуульдаа оролцож чадсангүй. Оюутнууд бүртгэлтэй хаяг, гэртээ очиж сонгуулиа өгч чадсангүй. Гадаад дахь маш олон монгол саналаа өгч чадсангүй. Учир нь санал авах байр нь зөвхөн Элчин сайдын яам. Саналаа өгөхийн тулд нэг хүний 1500 ам.долларын зардал ч гарч байна. Ийм байдлаар яаж иргэдийнхээ саналыг авч чадах юм. Цаашид цахим үндэстэн болохоор зорьж байгаа бол гар утсан дээр сонгуулиа зохион байгуулдаг болъё” гэлээ.

ХҮН-аас мөнгөгүйгээр сонгууль зохион байгуулах боломжтой гэдгийг тодотгосон юм. Энэ талаар тус намын УЗ-ын дарга Т.Доржханд “Манай эвслээс энэ сонгуульд нийт 1.2 тэрбум төгрөг зарцуулсан. Энэ бүх санхүүжилт хандиваар боссон. Мөнгөгүйгээр сонгууль хийж болдгийг бид харууллаа. Энэ хандивын дийлэнхийг гадаадад байгаа монголчууд маань гаргасан. Магадгүй бидэнд илүү их мөнгө боссон бол ялалт байгуулах боломжтой байсан байх. Гэхдээ өөрсдийнхөө хэмжээнд маш их мөнгө босгож чадлаа. Та нартаа баярлалаа” гэсэн юм.