АНУ-ын Ерөнхийлөгч асан Дональд Трамп Хятадын TikTok, WeChat зэрэг платформуудыг Хятадын тагнуулын албатай холбоотой гэж хүчтэй эсэргүүцэж, АНУ-д ашиглахыг хориглож байсан билээ. Гэвч энэ шийдвэр хуулийн олон асуудалтай тулгарснаас болж бүрэн хэрэгжиж амжаагүй байсан юм. Тэгвэл энэ долоо хоногт Ерөнхийлөгч Жо Байден дээрх хоригийг хүчингүй болгож, АНУ-д эдгээр платформуудыг чөлөөтэй хэрэглэхийг зөвшөөрлөө.

Хэдийгээр Трампын тушаал хүчингүй болж, дээрх платформын хэрэглээ нээлттэй болсон ч цаашид АНУ-ын харилцаа холбооны департмент зөвхөн TikTok, WeChat тэргүүтэй гадаад оронд хөгжүүлсэн платформуудын үйл ажиллагааг нарийн хянахаар болжээ.

Уг шийдвэрээ Жо Байден “Эдгээр платформ АНУ-ын үндэсний аюулгүй байдалд аюул заналхийлж байгаа эсэхийг тогтоохын тулд баримт нотолгоо хэрэгтэй” хэмээн тайлбарласан байна. Харин TikTok платформыг хөгжүүлэгчдийн зүгээс дээрх шийдвэртэй холбоотой албан ёсны хариу өгөөгүй байна.

Эх сурвалж: BBC