Хөвсгөл аймгийн Тосонцэнгэл сумын нутаг, Сэлэнгэ мөрөнд долоон хүн осолдсон харамсалтай хэрэг дөрөвдүгээр сарын 21-нд гарсан. Тус аймгийн харъяат арван хүн Тээл багаас Рашаант сум руу явахаар гол мөрнийг завиар гатлах үед татлага олс нь тасарч, завь онхолдсон. Энэ үеэр 3, 16, 38 настай гурван эрэгтэй ар голын эрэг дээр эсэн мэнд гарсан бол долоо нь усанд осолдсон юм.

Осолдсон газраас 3-20 километр зайтай газраас дөрөвдүгээр сарын 23-нд  50 настай эрэгтэй, 62 настай эрэгтэй болон таван сартай нярай, найман настай хүүхдийн  цогцсыг тус, тус олсон.

Эрэн хайх ажиллагааг тавдугаар сарын 2-ыг  хүртэл зохион байгуулахад дөрвөн хүний цогцсыг олж, гурван  хүний цогцос олдоогүй тул эрэн хайх ажиллагааг ар гэрийнхэнтэй нь зөвшилцөж зогсоогоод байсан юм. Улмаар иргэний өгсөн дуудлагын дагуу  зургадугаар сарын 3-ны өдрийн 21:40 цагт  “Сэлэнгэ мөрөн”-ний эрэг дээр буюу осолдсон газраас 43 км-ын зайтай газраас  32 настай, эмэгтэй У-гийн цогцсыг олж Цагдаагийн газрын бүрэлдэхүүнд шилжүүлэн өгсөн байна.