Хөлбөмбөгийн шилдэг тамирчин Н.Цэдэнбал зодог тайллаа

Монголын хөлбөмбөгийн шигшээ багийн ахлагч, Эрчим клубын тоглогч Н.Цэдэнбал их спортоосоо зодог тайлж буйгаа зарлалаа. Энэ талаараа тэрбээр өөрийн цахим хуудсаараа дамжуулан мэдэгджээ.

Н.Цэдэнбал өөрийн цахим хуудаснаа:

"Өнөөдөр эх үрс бүхэнд аз жаргал хүсч, энэ хорвоод мэндэлсэндээ талархдаг өдөр. Миний хувьд ч бас энэ биеийг минь төрүүлж өсгөсөн тэнгэрт заларч байгаа эмээ өвөөдөө, хажууд минь үргэлж хамт байдаг хайрт ээждээ, их спортод өдий зэрэгтэй болгосон эрхэм багш нартаа, амьдралын маань утга учир байсан хөлбөмбөгтөө талархах өдөр юм.

Би 1999 оны зургадугаар сард анх удаа сургуулийнхаа хөлбөмбөгийн тэмцээнд орсноос эхлээд “хөлбөмбөг” гэдэг гайхалтай сайхан спортод шунан дурлаж, тасралтгүй хичээллэн, өнөөдрийг хүртэл нийт 22 жилийн турш хожил бүхэнд баярлаж, хожигдол бүрээсээ суралцаж, спортын бэрхшээл, жаргал зовлонг туулжээ. Олон сайхан анд нөхөдтэй болж, олон улс оронд очиж, бас Катар-2022 ДАШТ-ний бүх дэлхийн анхны гоолыг оруулснаараа ОУХБХ-ны Ерөнхийлөгчөөс Катар-2022 ДАШТ-ний аваргын тоглолт үзэх урилга авсан зэрэг гайхалтай дурсамжтай сайхан мөчүүдийг мэдэрч өнгөрүүллээ.

2000 оноос өсвөр, залуучуудын улсын аваргын тэмцээнүүдэд амжилттай оролцож эхэлснээсээ хойш МХБХ-ны Дээд лигийн хоёр удаагийн аварга, МХБХ-ны Цомын гурван удаагийн аварга, мөн гурван удаа лигийн шилдэг тоглогч болжээ.

Анх 2005 оноос Монгол Улсынхаа өсвөр үе залуучууд нэрийн өмнөөс тоглож, анх 2009 онд шигшээ багтаа дуудагдаж 34 удаа олон улсын албан ёсны тоглолтонд оролцож 7 гоол оруулжээ. 2018 онд Монгол Улсын шигшээ баг анх удаа Зүүн Азийн аварга шалгаруулах тэмцээнд хэсгээсээ шалгарч, тэр тэмцээний “Үнэ цэнтэй тоглогч”-ийн шагнал хүртэж, 2020 онд хөлбөмбөгийн спортоор ОУХМ цол авчээ. Мөн Монгол Улсад футзалын спорт хөгжиж эхлэхэд 2015 онд футзалын шигшээ багийн бүрэлдэхүүнд олон улсын албан ёсны таван тоглолтонд оролцож зургаан гоол оруулсан байна.

Энэ бүх амжилтын дөрөөнд хүргэж, дэмжиж тусалж ирсэн багш дасгалжуулагчид, мөр зэрэгцэн тоглож, эх орныхоо нэр хүндийн төлөө хүчин зүтгэж байсан тамирчид, найз нөхөд, ах дүү нар, хөгжөөн дэмжигчид та бүхэнд чин сэтгэлээсээ баярлалаа. Ялангуяа анхны багш Рэндо, Болд, “Унаганууд” клубын дасгалжуулагч Эрдэнэ-Очир нартаа талархаад баршгүй. Мөн МХБХ болон үе үеийн шигшээ багийн дасгалжуулагч нартаа баярлалаа. Цаг наргүй бөмбөг хөөж явахад үргэлж ойлгож, дэмжиж ирсэн ээждээ, гэр бүлийнхэндээ бас дахин баярлалаа. Та нартаа сайн сайхан бүхнийг хүсье.

Хөлбөмбөгт хоёргүй сэтгэлээр зүтгэж, хүрэх замынхаа зохих хэмжээнд хүрчээ гэж бодож байна. Хөлбөмбөгийг “хайр сэтгэлээ” болгон амьдарч ирсэн тамирчны хувьд, өөртөө өндөр шаардлагыг тавьж, чин сэтгэлээр өөрийгөө хөгжүүлж, шаргуу бэлтгэлээ хийж, талбайд гарч байвал амжилтанд хүрнэ шүү гэж залуу тамирчин дүү нартаа зөвлөе. Хөгжлийн төлөө зөв бодлоготой, залуу үеийнхээ төлөө анхаарах эрмэлзэлтэй, шударга, олон улсын түвшинд ажиллаж чадвал цаашид Монголын хөлбөмбөг хурдацтай хөгжинө гэдэгт итгэж байна.

Ингээд өнөөдөр жирийн тамирчин би 22 жилийн аз жаргал минь болсон хөлбөмбөгийн спортод зүтгэх ажлаа дуусгаж, их спортын төлөө цохилох зүрхтэй Монгол Улсын иргэний хувьд амьдрах болно. Монголын хөлбөмбөг мандан бадрах болтугай” хэмээжээ.

Н.Цэдэнбал бол өнөөгийн Монголын хөлбөмбөгийн шилдэг тоглогчдын нэг төдийгүй Монголын шигшээ багийг ДАШТ-ий эрхийн тэмцээний хоёрдугаар шатанд шалгарахад чухал үүрэг гүйцэтгэсэн тоглогч билээ.