Улаанбаатар хотын гаалийн газраас өнөөдөр /2021.5.27/ хүлээгдэж байгаа ачаа барааны эргэлт болон улсын төсвийн орлого болон гаалийн газрын зарим терминалуудын нөхцөл байдлын талаар мэдээлэл хийлээ.

УЛААНБААТАР ХОТЫН ГААЛИЙН ГАЗРЫН ХЯНАЛТ ШАЛГАЛТЫН ХЭЛТСИЙН ОРЛОГЧ ДАРГА П.СҮХБАТ:

-Улсын хэмжээнд хатуу хөл хорио тогтоосонтой холбоотойгоор зарим иргэн, ААН-ийн барааны бөөгнөрөл гааль дээр үүссэн. Иймээс гаалийн байгууллага энэ сарын 6-наас ирэх зургаадугаар сарын 30-ныг хүртэл уртасгасан цагаар ажиллаж байна. Одоогийн байдлаар гааль дээр үүссэн бөөгнөрөл арилсан байгаа. Тээвэр зууч, төмөр зам, мэргэжлийн хяналт зэрэг байгууллагууд уртасгасан цагаар хамтран ажиллаж байна. Уртасгасан цагаар ажилласнаар иргэдийн хувьд төдийгүй улсын төсөвт өнгөрсөн хугацаанд 38 тэрбум төгрөгийг төвлөрүүлсэн. Иргэдийн хувьд халдвар хамгааллын журмыг баримтлан бараагаа ирж авахыг хүсч байна. 2020 оны эхний таван сартай харьцуулахад нийслэлийн гааль экспорт 145.5 хувь нэмэгдэж, барааны эргэлт 21.2 хувиар өссөн байгаа. Өмнө жилийн мөн үетэй харьцуулахад төвлөрүүлсэн хөрөнгө мөн нэмэгдсэн. 14 гааль хяналтын бүс дээр 1100 вагон чингэлэг байгаа. Хатуу хөл хориотой үед нефть, хүнс зэрэг бүтээгдэхүүнийг нэвтрүүлэх хэвийн явагдаж байгаа. Гааль дээр гацсан, бөөгнөрсөн барааны асуудлыг шийдвэрлэсэн. Халдвар ариутгалын хувьд Мэргэжлийн хяналтын газраас хяналт тавьж ажиллаж байгаа. Аж ахуй нэгжүүд гаалийн байгууллагатай хамтарч ажиллаж байгаа учраас тулгамдаж байгаа асуудал байхгүй байна.