Сүүлийн үед Калифорни мужид хэд хэдэн орон байрны хулгайн хэрэг бүртгэгдэж, сэжигтэн нь огт олдохгүй байжээ. Хэргийн газруудын ойролцоох хяналтын камеруудын бичлэгийг үзэхэд сэжигтэн үргэлж амаа ангайж яваа нь хачирхалтай санагдсан боловч яагаад гэдгийг нь хэн ч мэдэхгүй байв. Удтал баригдалгүй давтан хэрэг үйлдсээр байсан сэжигтнийг үйлдэл дээр нь барих завшаан тохиожээ. Чухам тэр үед л цагдаа нар хэрэгтнийг яагаад үргэлж амаа ангайн явдаг байсны учрыг олсон байна. Сэжигтэн эр үнэндээ хар арьстан бөгөөд зүсээ хувиргахын тулд бодит мэт харагддаг цагаан арьсан баг өмсдөг байжээ.

Сэжигтэн 30 настай Роким Провеллийг Лос Анжелес хотод бүртгэгдсэн 30 орчим орон байрны хулгайн хэрэгт холбоотой хэмээн үзэж байгаа аж. Хэрэгтэн ихэнхдээ сүүлийн үеийн том дэлгэцтэй хавтгай зурагт хулгайлдаг байна. Түүний үйлдсэн гэмт хэргүүдийг цагдаа нар шалгасан ч сэжигтний талаар сэжүүр олдохгүй байжээ. Гэтэл энэ сарын 2-нд Беверли Хиллсийн цагдаа нар сэжигтэй тээврийн хэрэгслийг саатуулан шалгахад дотроос нь нүүрний баг, хулгайн зурагт гэх мэт эд зүйлс олдож, Роким Провеллийг баривчилсан байна.

Эх сурвалж: GRIO