НЭМЭЛТ:

Захиргааны хэргийн давж заалдах шатны шүүхээр өнөөдөр /2021.05.10/ 13.30 цагаас АН-ын тамгатай холбоотой маргааныг хэлэлцэж, шүүх хуралдааныг дахин долоо хоногоор хойшлуулжээ. Тодруулбал, нэхэмжлэгчийн итгэмжлэгдсэн төлөөлөгч Н.Нямжаргалын гаргасан шүүх хурал давхцсан тул уг шүүх хуралдаанд биечлэн оролцох боломжоор хангаж өгнө үү гэсэн хүсэлтийн дагуу 2021 оны тавдугаар сарын 17-ны өдрийн 9.00 цагт шүүх хуралдааныг товлосон гэдгийг Захиргааны хэргийн давж заалдах шатны шүүхийн Тамгын газраас мэдээлэв.

АН-ЫН ТАМГАТАЙ ХОЛБООТОЙ ДАВЖ ЗААЛДАХ ШАТНЫ ШҮҮХ ХУРАЛ БОЛНО

Захиргааны хэргийн давж заалдах шатны шүүхээр өнөөдөр /2021.05.10/ 13.30 цагаас АН-ын тамгатай холбоотой маргааныг хэлэлцэнэ. Ардчилсан намын нэхэмжлэлтэй, Улсын бүртгэлийн ерөнхий газрын Хяналт шалгалт болон Хуулийн этгээдийн бүртгэлийн газарт тус тус холбогдох, Нийслэл дэх Захиргааны хэргийн анхан шатны шүүхийн шүүгчийн 2021 оны хосрдугаар сарын 2-ны өдрийн “Хүсэлт шийдвэрлэж, хэрэг хянан шийдвэрлэх ажиллагааг түдгэлзүүлэх тухай” 955 дугаар захирамжийг хариуцагч болон гуравдагч этгээдийн гомдлоор  хэлэлцэх юм. Уг шүүх хуралдаан энэ сарын 4-ний өдөр товлогдсон боловч шүүх хуралдааны явцад нэхэмжлэгчийн өмгөөлөгчөөс гаргасан тус шүүхийн нийт шүүгчдийг татгалзан гаргах тухай хүсэлтийг Шүүгчдийн зөвлөгөөн хянан шийдвэрлэх хүртэл хугацаагаар шүүх хуралдааныг  өнөөдрийг хүртэл хойшлуулсан юм.

Сануулахад, АН-ын даргаар ажиллаж байсан С.Эрдэнэ  2020 оны  арванхоёрдугаар сарын 21-ний өдөр УБЕГ-т Ц.Туваан миний тамгыг өгөхгүй байна, шинэ тамга гаргаж өгнө үү гэсэн агуулгатай хүсэлт гаргасан байдаг. Энэ хүсэлтийн дагуу УБЕГ-ын улсын байцаагчийн шийдвэр  гарч, АН-ын ашиглаж байсан тамга хүчингүй болж С.Эрдэнэд 2020 оны арванхоёрдугаар сарын 25-нд УБЕГ-аас шинэ тамга олгосон.

Үүнийг АН-ын нөгөө тал эсэргүүцэж, АН-ын тамгыг шинээр С.Эрдэнэд олгосон УБЕГ-ын шийдвэр нь Улсын бүртгэлийн ерөнхий хууль, Хуулийн этгээдийн улсын бүртгэлийн тухай хууль, ХЗДХ-ийн сайдын 2018 оны А/216 журмыг зөрчсөн гэж үзэн нийслэлийн Захиргааны хэргийн шүүхэд хандсан. Уг гомдлыг нийслэлийн захиргааны хэргийн анхан шатны шүүх 2021 оны хоёрдугаар сарын 2-нд хэлэлцээд УБЕГ-ын улсын байцаагчийн дүгнэлтийг түдгэлзүүлсэн. Өөрөөр хэлбэл, АН-ын шинэ тамгыг хүчингүй болгож хууль ёсоор ашиглах боломжгүй болгосон юм.