Шведийн тавилга үйлдвэрлэгч “Ikea” компани бүтээгдэхүүний хаягдлыг бууруулахын тулд хуучин тавилгаа худалдаж авч, эргүүлэн худалдахаар болсноо мэдэгджээ. Тус компани нь 2030 он гэхэд байгальд ээлтэй компани болохоор зорьж байгаа ба энэхүү зорилгынхоо хүрээнд дээрх шийдвэрийг гаргасан байна.

Хэрэглэгчид хэрэглэхээ больсон, цэвэрхэн эдэлсэн тавилгаа буцааж тухайн дэлгүүртээ ашиглах ваучераар солих боломжтой болж байгаа аж. Хуучин тавилгуудыг худалдан авах үнийн хувьд, сэв зураасгүй бол үндсэн үнийн дүнгийн 50 хувьтай тэнцэх үнээр, бага зэрэг зураастай бол 40 хувь, нэлээд зураас гарсан бол 30 хувьтай нь тэнцэх үнийн дүнд нь ваучер олгох юм байна.

Энэ ажлыг өнгөрсөн арваннэгдүгээр сараас хэрэгжүүлэхээр төлөвлөж байсан ч цар тахлын улмаас хойшлуулсаар өдийг хүрсэн байна. Одоогоор Их Британи даяарх “Ikea”-гийн дэлгүүрүүдэд энэ санаачилга хэрэгжээд эхэлжээ. Цаашид “Ikea” албан ёсны үйл ажиллагаагаа явуулдаг 26 улсад хэрэгжүүлэхээр төлөвлөсөн байна.

Эх сурвалж: BBC