Манай улс 21 аймагт оршин суух хүн амаа бүрэн дархлаажуулах ажлыг үе шаттайгаар эрчимжүүлэхээр ажиллаж байгаа билээ. Энэ оны тавдугаар сарын 1-ний өдрийн байдлаар орон нутагт вакцинд хамрагдах 18-аас дээш насны хүн амын тоо 1,114,234 байна. Одоогийн байдлаар орон нутгийн иргэдийн 174903 нь вакцины нэгдүгээр тун, 47553 нь хоёрдугаар тунд хамрагджээ.

Ерөнхий сайд Л.ОЮУН-ЭРДЭНЭ "Одоогоор зорилтот бүлгийнхээ 43 хувийг вакцины эхний тунд хамруулаад байна. Өнөөдрөөс орон нутагт вакцинжуулалтыг эхлүүлэх боломжтой боллоо. Орон нутгийн иргэдээ вакцинжуулалтад идэвхтэй хамрагдахыг уриалж байна. Бид зургадугаар сарын 1-ний өдөр гэхэд орон нутгийн иргэдээ Covid-19-ийн эсрэг эхний тунгийн вакцинжуулалтад хамруулахаар төлөвлөсөн. Ингэж чадвал долдугаар сарын 1-ний өдөр гэхэд хоёр дахь тунг хийх боломжтой болно. Вакцины нийлүүлэлтийг тасалдуулахгүй байх асуудалд анхаарч, Засгийн газар хичээн ажиллана" гэсэн юм.

Энэ оны дөрөвдүгээр сарын 30-наас тавдугаар сарын 1-ний өдрүүдэд 11 аймагт вакцин 121 мянган тунг түгээсэн. Өнөөдөр (2021.05.02) 93 мянган тун вакциныг 11 аймагт илгээх явуулын багийн цуваа хөдөллөө. Үүнд:

-Өмнөговь аймагт 14000 тун,

-Сүхбаатар аймагт 8000 тун,

-Ховд аймагт 13000 тун,

-Архангай аймагт 10000 тун,

-Говьсүмбэр аймагт 4000 тун,

-Баянхонгор аймагт 10000 тун,

-Хэнтий аймагт 6000 тун,

-Дорноговь аймагт 13000 тун,

-Төв аймагт 6000 тун,

-Дундговь аймагт 5000 тун,

-Дархан-Уул аймагт 4000 тун вакцины тээвэрлэлтийг цагдаагийн хамгаалалттайгаар түгээх аж. Түүнчлэн зарим алслагдсан аймгууд руу вакцин нэмж илгээхээр бэлтгэж байгаа талаар холбогдох албаныхан мэдээлэв.

Ц.ЯНЖИНДУЛАМ