Манай улс Covid-19-ийн эсрэг вакцин хийлгэсэн иргэдийг бүртгэлжүүлж, цахим бүртгэлийг төрийн нэгдсэн систем болох e-mongolia.mn сайтад холбосон. Ийнхүү дархлаажуулалтын мэдээлэл цахим хэлбэрт шилжсэн нь иргэд, олон нийт вакцины гэрчилгээ болон бусад төрлийн үйлчилгээг авахад илүү дөхөм болсон гэдгийг албаныхан онцолж буй.

Тухайлбал, Covid-19 цар тахлын вирусээс урьдчилан сэргийлэх вакцинжуулалтад хамрагдсан иргэд гэрчилгээгээ E-Mongolia цахим хуудаснаас авах юм. Ингэхдээ вакцины гэрчилгээг албан форматын дагуу лавлагаа хэлбэрээр монгол болон англи хэл дээр  авах боломжтой аж. Вакцины гэрчилгээг авахын тулд:

-E-Mongolia систем рүү нэвтэрнэ

-Өөрийн утасны дугаар, тоон гарын үсэг болон цахим банкны бүртгэлээрээ нэвтрэн орно

-Монгол Улсын иргэн цэс рүү дарж орно

-Ковид-19 цэс рүү орно

-Урьдчилан сэргийлэх тарилгын гэрчилгээг сонгоно

-Үйлчилгээ авах цонхыг товшиж, гэрчилгээгээ үнэгүй татан авна.

Covid-19-ийн эсрэг дархлаажуулалтын ажил нийслэл болон хөдөө орон нутагт эхэлсэн байгаа билээ. Улаанбаатарт өнөөдөр дархлаажуулалтын суурин 112 цэг, явуулын /автобус/ долоон цэгт 256 багийн 2109 эмч, эмнэлгийн мэргэжилтэн ажиллаж байгаа юм. Нийслэлийн хэмжээнд 15 цагийн байдлаар  вакцины нэгдүгээр тунд 20277, хоёрдугаар тунд 13611, нийт 33888 иргэнийг хамруулжээ.

Ц.ЯНЖИНДУЛАМ