Жил бүр уламжлал болон зохион байгуулагддаг Боаогийн Азийн чуулга уулзалтын нээлтийн ёслолын ажиллагаа Мягмар гаригт Хятадын өмнөд хэсгийн Хайнань мужийн Боао хотод боллоо. Тус чуулга уулзалтыг нээлт дээр Хятадын дарга Ши Жиньпин илтгэл тавив.

Тэрбээр “Хятад улс Covid-19 цар тахалтай тэмцэхдээ бусад улстай хүчин чармайлтаа нэгтгэхийг зорьж, бусад улс руу чиглэсэн нээлттэй байдлаа нэмэгдүүлнэ. Олон талт хамтын ажиллагааны зарчим, Дэлхийн худалдааны байгууллагын статусыг бэхжүүлэхийг дэмжиж байна. Бид цахим эдийн засаг, биотехнологи зэрэг чиглэлд хамтын ажиллагаагаа бэхжүүлж, түншлэлийн харилцаагаа гүнзгийрүүлж, таатай нөхцөл боломжуудыг ашиглах шаардлагатай байна” гэж хэлжээ.

Мөн Covid-19-ийн эсрэг вакцины хөгжүүлэлт, үйлдвэрлэлийн хүрээнд бусад улс оронтой хамтын ажиллагаагаа өргөжүүлэн хөгжүүлэхийг зорьж буйгаа Ши Жиньпин мэдэгдэв. Тэрбээр “Бид нэг завин дээр байна. Иймд вакцин үйлдвэрлэх, нийлүүлэх чиглэлд хамтын ажиллагаагаа нэмэгдүүлэх шаардлагатай. Бид ард түмнийхээ ашиг сонирхолд онцгой анхаарал хандуулах, амь насыг нь хамгаалах, эрүүл мэндийн хөгжлийн түвшинг нь дээшлүүлэх ёстой. Цар тахал үргэлжилсээр байгаа ч бид ард нь гарах болно” хэмээн онцлон тэмдэглэжээ.

“Хувьсан өөрчлөгдөж буй дэлхий ертөнц: “Бүс ба зам” санаачилгын хүрээнд глобал удирдлага, хамтын ажиллагааны төлөө хүчээ нэгтгэе” уриан дор зохион байгуулагдаж буй энэ удаагийн чуулга уулзалт энэ сарын 21-ний өдрийг хүртэл үргэлжилнэ.

Тус чуулга уулзалтад дэлхийн 60 гаруй улсын 2600 гаруй төлөөлөгч оролцож буй бөгөөд 18 улсын мэдээллийн агентлаг, 160 гаруй хэвлэл мэдээллийн томоохон байгууллагын төлөөлөл сурвалжилж буй нь цар тахлаас хойших хамгийн өргөн хүрээтэй олон улсын арга хэмжээ болж байна.

Эх сурвалж: XINHUA, TASS