Биеийн байдал нь хөнгөн 2060, хүндэвтэр 791, хүнд 223, маш хүнд 57 хүн байна. Биеийн байдал нь маш хүнд хүмүүс өдрөөс өдөрт нэмэгдэж байна. Хүний нөөцийн тал дээр бэрхшээл бий. Эрчимт эмчилгээний тасагт ажиллаж буй хүний нөөц хязгаарлагдмал.

ДАРХЛАА МУУТАЙ, СУУРЬ ӨВЧТЭЙ ХҮМҮҮСИЙН БИЕИЙН БАЙДАЛ АМАРХАН ХҮНДЭРЧ БАЙНА

ХӨСҮТ-ийн Эрчимт эмчилгээний тасгийн их эмч Б.БОЛОР-ЭРДЭНЭ:

-Хүнд өвчтөн нэмэгдэх хэрээр нас баралт нэмэгдэж байна. Манай тасагт яг одоо найман хүн эмчлүүлж байна. Өчигдөр уг нь 10 байсан боловч хоёр хүн нас барлаа. Дураараа өөрсдийгөө эмчлэх гэж оролдсон хүмүүс байна. Дархлаа муутай, суурь өвчтэй хүмүүсийн биеийн байдал амархан хүндэрч байна. Зайлшгүй биш л бол гарах шаардлагагүй. Гарахаар бол халдвар хамгааллын дэглэмээ сайн сахих хэрэгтэй. Сувилагч нар маань 5-7 цагийн турш өвчтөний хажууд байж байна. Covid-19-ийн өвөрмөц эмчилгээ хийхгүй байгаа ч өндөр хөгжилтэй орнуудын хийдэг эмчилгээг л хийж байна. Бид эрчимт эмчилгээний тасагт 14 хоног тасралтгүй ажилладаг. Ажлаа дуусгаад тусгаарлалтад долоон хоног байдаг. Одоо 22 хоног эрчимт эмчилгээний тасагт хэвтэж буй хүн байна. Амьсгалж чадахгүй, амьсгалын аппараттай амьсгалдаг. Нэг өрөөнд гурван өвчтөн байна. Нас баралтын тоо сүүлийн үед өндөр байна. Тиймээс хамгийн гол нь халдвар авахгүй, тараахгүй байх хэрэгтэй. Зовиур илэрвэл заавал эмнэлгийн байгууллагад ханд.

Халдварын тохиолдол:

• Улаанбаатар хотод – шинээр 895 тохиолдол
• Баян-Өлгий аймагт –шинэ тохиолдол бүртгэгдээгүй
• Увс аймагт – шинээр 3 тохиолдол
• Ховд аймагт- шинээр 2 тохиолдол
• Хөвсгөл аймагт – шинээр 5 тохиолдол
• Завхан аймагт –шинэ тохиолдол бүртгэгдээгүй
• Булган аймагт – шинэ тохиолдол бүртгэгдээгүй
• Архангай аймагт – шинэ тохиолдол бүртгэгдээгүй
• Баянхонгор аймагт – шинээр 1 тохиолдол
• Өвөрхангай аймагт – шинэ тохиолдол бүртгэгдээгүй
• Төв аймагт – шинэээр 4 тохиолдол
• Дорнод аймагт – шинээр 2 тохиолдол
• Сүхбаатар аймагт – шинээр 18 тохиолдол
• Хэнтий аймагт – шинээр 3 тохиолдол
• Дархан-Уул аймагт – шинээр 28 тохиолдол
• Орхон аймагт – шинээр 13 тохиолдол
• Сэлэнгэ аймагт- шинээр 2 тохиолдол бүртгэгдэж, нийт тохиолдол 312
• Говьсүмбэр аймагт – шинээр 1 тохиолдол
• Дорноговь аймагт – шинэ тохиолдол бүртгэгдээгүй
• Зөөвөрлөгдсөн – шинээр 3 тохиолдол тус тус бүртгэгдэв.

COVID-19-ИЙН ҮЕД ТААГҮЙ ҮЙЛ ЯВДЛЫН СТРЕСС БУЮУ АРХАГ СТРЕСС ҮҮСЧ БАЙНА

Сэтгэцийн эрүүл мэндийн үндэсний төвийн их эмч Ж.ГАНТУЛГА:

-Дэлхий дээр сэтгэл гутрах эмгэгтэй 350 сая орчим хүн байдаг. Сэтгэл гутрал нь амиа хорлох үйлдэлд хүргэдэг. Жил бүр 800 мянган хүн амиа хорлож байгаа бөгөөд үүний ихэнх нь 15-29 насныхан байдаг. Мөн сэтгэл гутрах эмгэг хөдөлмөрийн чадвар алдалтад хүргэдэг тэргүүлэх шалтгаануудын нэг. Сэтгэл гутрал эмэгтэйчүүдэд илүү тохиолдох ба эмчилгээ үр дүнтэй. Насанд хүрэгчдийн 10-15 хувьд, өсвөр насны хүүхдийн 5-10 хувьд сэтгэл гутрах эмгэг тохиолддог. Эмнэлзүйн судалгаанд дурдсанаар нярай хүүхдүүдийн 0.5-3 хувьд, 2-5 насны хүүхдүүдийн 2.1 хувьд, өсвөр насны хүүхдүүдийн 1.5-8 хувьд нь сэтгэл гутрах эмгэг тархдаг. Тиймээс хүүхдүүдээ анзаарч, мэдэрч байх хэрэгтэй. Сэтгэл гутралыг дараах зүйлс үүсгэж байгаа. Тодруулбал, удамшил, мэдрэл биологийн хүчин зүйл, биеийн өвчин эмийн эмчилгээ, таагүй үйл явдал, стресс. Covid-19-ийн үед таагүй үйл явдлын стресс буюу архаг стрессийг үүсч байна. Хоёр жил гаруй үргэлжилж байгаа энэ үйл явдал сэтгэл гутрал үүсгэх шалтгаан болж байна.