Эрүүл мэндийн яамнаас өнөөдөр /2021.04.16/ Covid-19-ийн нөхцөл байдлын талаар цаг үеийн мэдээлэл хийж байна.

ЭМЯ-ны хэвлэлийн ажилтан Б.УУГАНБАЯР:

-Монгол Улсад сүүлийн 24 цагт 11883 хүнд шинжилгээ хийхэд Covid-19-ийн 1107 шинэ тохиолдол бүртгэгджээ. Халдварын нийт тохиолдол 19672 болсон байна. Covid-19 халдварын улмаас зургаан хүн нас баржээ. Ингээд Covid-19-ийн шалтгаант нийт нас баралт 37 боллоо.

Тодруулбал, 34 настай эрэгтэй дөрөвдүгээр сарын 13-нд онош нь батлагдсан бол 49 настай эрэгтэй дөрөвдүгээр сарын 6-нд онош нь батлагдаж, Цэргийн төв эмнэлэгт хэвтэн эмчлүүлж байгаад нэн хүнд хэлбэрээр нас барлаа. Мөн 76 настай эмэгтэй онош нь энэ сарын 7-нд батлагдаж, ХӨСҮТ-д эмчлүүлж байсан бол 64 настай эмэгтэй энэ сарын 12-нд батлагдаж, мөн ХӨСҮТ-д эмчлүүлж байсан. Халдварын улмаас нас барсан 58 настай эрэгтэйгийн хувьд гуравдугаар сарын 15-нд батлагдаж, ХӨСҮТ-д эмчлүүлж байсан бол 62 настай эрэгтэй дөрөвдүгээр сарын 12-нд онош батлагдаж, Сүхбаатар аймгийн Нэгдсэн эмнэлэгт эмчлүүлж байгаад нэн хүнд хэлбэрээр нас барсан байна.

Мөн сүүлийн 24 цагт 406 хүн эдгэрч гарснаар нийт халдварын 11044 хүн эдгэрээд байгаа юм.  Шинээр бүртгэгдсэн халдварын 1024 нь Улаанбаатарт бүртгэгдэж, нийт халдварын тоо 16759 болсон бол, орон нутагт нэмж 84 нь тохиолдол бүртгэгдэж, нийт халдварын тоо 2359 боллоо.

Халдварын тархалтыг аймгуудаар нь авч үзвэл,

• Дархан-Уул аймаг- 4
• Орхон – 12
• Дорнод аймаг-1
• Сүхбаатар аймаг- 2
• Дундговь аймаг- 8
• Өвөрхангай аймагт- 4
• Баянхонгор аймагт- 2
• Архангай аймаг- 19
• Төв аймаг-17
• Хэнтий-2
• Сэлэнгэ-3
• Увс-3
• Ховд аймаг-7 тохиолдол тус бүр батлагдаад байна.

Улсын хэмжээнд 3025 хүн Covid-19-ийн улмаас хэвтэн эмчлүүлж байна. Нийт эмчлүүлж байгаа хүмүүсээс,

• 2048 хүний бие хөнгөн
• 723 хүний бие хүндэвтэр
• 201 хүний бие хүнд
• 53 хүний биеийн байдал нэн хүнд байна. Гэрийн тусгаарлалт, эмчилгээнд 1090 хүн байна. Ойрын хавьтагч болсон 10946 хүн тусгаарлалтад байна.

"ХҮНДЭВТЭР, ХҮНД, НЭН ХҮНД ХҮНИЙ ТОО 28-30 ДАХИН НЭМЭГДСЭН"

ЭМЯ-ны Эмнэлгийн тусламжийн бодлогын хэрэгжилтийг зохицуулах газрын дарга Б.БУЯНТОГТОХ:

-Батлагдсан тохиолдлын тоо нэмэгдэхийн хэрээр эмнэлгийн ачаалал нэмэгдэж байна. Хүндэвтэр, хүнд, нэн хүнд хүний тоо нэг сарын өмнөхтэй харьцуулахад 28-30 дахин нэмэгдсэн. Энэ нь эмнэлгийн ачааллыг 10-аас дээш хувиар нэмэгдүүлж байна. ЭМЯ, НЭМГ, УОК хамтраад нэмж ор дэлгэх ажлыг үе шаттай зохион байгуулж байгаа бөгөөд хүний нөөцийн хувьд нэлээд төвөгтэй байдал үүслээ. Хатуу өл хорионы 14 хоногийн хугацаанд халдварын тархалтыг барьж дийлэхгүй. Амьсгалын аппарат улсын хэмжээнд хангалттай байгаа ч түүнийг ажиллуулдаг хүний нөөц хомсдолд орж байна. Эрчимт эмчилгээний тасагт ажилладаг эмч мэргэжилтнүүдийн нөөц хязгаарлагдмал байдаг.

Эрчимт эмчилгээний орны тооноос 2-3 дахин их амьсгалын аппарат бэлдсэн байгаа. Одоогоор эрчимт эмчилгээнд орсон хүмүүс тоног төхөөрөмж дутагдах, хүний нөөц хомсдох зэргээс үүдэн эмнэлгийн тусламж авч чадахгүй болох нөхцөл бүрдээгүй байна. Гэхдээ нөхцөл байдал энэ хэвээр үргэлжилбэл эрсдэлтэй нөхцөл байдал үүснэ. Уушги орлуулагч ECMO аппарат Улсын Нэгдүгээр төв эмнэлэг дээр нэг байгаа. Сая дахин нэг шинэ аппарат ирснийг Цэргийн төв эмнэлэгт суурилуулж байна. Энэ сарын сүүлчээр дахиад нэг ирэх бөгөөд Улсын Гуравдугаар төв эмнэлэгт суурилуулна. Халдвар бүх нийтэд тарчихсан, хаанаас ч оношлогдож болно. Халдвар таны хажууд байгаа учраас хөл хориог ухамсартайгаар чандлан мөрдөх хэрэгтэй" гэлээ.