Дэлхийн тэргүүн баячуудын нэг болсон Илон Маск өнгөрсөн долоо хоногт өөрийнх нь удирддаг "Neuralink" компанийн бүтээсэн, тархийг компьютертэй холбодог чипний тусламжтайгаар сармагчин цахим тоглоом тоглож буйг харуулсан бичлэг олон нийтэд нээлттэй цацсан билээ.

Бичлэгээс харахад сармагчин дээр туршсан чипний туршилт тун амжилттай болсон аж. Тиймээс тус компани хэрвээ зөвшөөрөл авч чадвал бүтээгдэхүүнийхээ дараагийн шатны туршилтыг нэг жилийн дотор хүн оролцуулан эхлүүлэхээр төлөвлөжээ. Өмнө нь Илон Маск хоёрдугаар сард хүн дээрх туршилтыг энэ оны сүүлээр эхлүүлэх төлөвлөгөөтэй байгаагаа ярьсан юм.

Хэрвээ хүн дээр хийх туршилт амжилттай болбол хүн тархиараа компьютертэй холбогдоод зогсохгүй альцгеймер тэргүүтэй тархины өвчнүүдийг анагаах боломж бүрдэх аж. Илон Маскийн мэдээлснээр, "Neuralink" компани засгийн газраас зөвшөөрөл авахаар шаргуу ажиллаж буй юм байна.

Тархины чип хэрэглээнд нэвтэрвэл хүмүүсийн тархины үйл ажиллагааг хянаж, цаашлаад тархитай холбоотой өвчнүүдийг эмчлэхэд үлэмж нэмэртэйгээс гадна ийм чиптэй хүн бодлоороо цахим технологиудыг удирдах чадвартай болох юм.

Эх сурвалж: BUSINESS INSIDER