Суэцийн сувгийг бөглөсөн "Ever Given" хөлөг онгоц амжилттай чөлөөлөгдсөн боловч аяллаа үргэлжлүүлэхэд нь дахин нэг саад учирчээ. Учир нь "Ever Given" хөлөг онгоц Суэцийн сувагт учруулсан хохирлоо барагдуулах ёстой аж. Египетийн эрх баригчдын мэдээлснээр энэ хөлгийн эзэмшигч тэрбум ам.долларын хохирол барагдуулахаас нааш хөлгийг хаашаа ч явуулахгүй гэнэ.

Тухайлбал, Суэцийн сувгийн удирдлагыг ахалдаг генерал Осама Раби “Ослын шалтгааныг бүрэн тодруулж, хохирлыг бүрэн барагдуулж дуустал хөлгийг хааш нь ч хөдөлгөхгүй. Энэ тал дээр бид хөлгийн эзэмшигчтэй амархан тохиролцоно хэмээн найдаж байгаа. Хохирол барагдмагц бид нэн даруй хөлгийг замд нь гаргана” хэмээн өнгөрсөн долоо хоногт мэдээлжээ.

Рабигийн хэлсэнчлэн Египетийн засгийн газар "Ever Given" хөлгийг чөлөөлсөн зардал хэмээн нэг тэрбум ам.доллар нэхэмжилж байгаа аж. Тус тэрбум долларт хөлгийг чөлөөлөхөд ашигласан техник технологи, багаж хэрэгслийн зардал, сувгийн эргийг нөхөн сэргээх зардал, хөлгийг чөлөөлөхөд ажилласан 800 орчим хүний хөлс, гацаанаас болж долоо хоног саатсан 400 гаруй хөлгийн нөхөн олговор зэрэг багтаж байгаа гэнэ.

Гэвч чухам хэр хэмжээтэй хэдэн төрлийн төлбөр нийлж нэг тэрбум ам.доллар болсон тухай нарийн мэдээлэл байхгүй юм. Ямартай ч Лондонд төвтэй санхүүгийн "Revenetiv" фирмийн тооцоолсноор Египетийн засгийн газар Суэцийн гацаанаас болж 95 сая ам.долларын татвар алдсан гэнэ. Түүнээс гадна дээрх хохирлыг яг хэнээс шаардаж байгаа нь тодорхойгүй хэвээр байна. Хөлгийг эзэмшигч Японы "Shoei Kisen Kaisha" компанид Египетийн эрх баригчдаас ямар ч албан ёсны мэдэгдэл ирээгүй гэнэ.

Эх сурвалж: BUSINESS INSIDER