Б.Хонгорзул, Б.Болортуяа нар олимпийн эрхээ авсан ч С.Цэрэнчимэд чадсангүй

НЭМЭЛТ:

Өсвөр үеийн ДАШТ-ий хүрэл медальт, 23 хүртэлх насны Азийнаварга, Баянхонгор аймгийн тамирчин 19 настай ОУХМ Б.Хонгорзул бүх өрсөлдөгчөө цэвэр ялж, шигшээд шалгарснаар “Токио-2020” олимпийн наадмын эрх авлаа. Тэрбээр хэсгийн барилдаанд Узбекистаны Шохида Ахмедова, Кыргызстаны Назира Марсбек Кызы, хагас шигшээд БНСУ-ын Ум Жи Ун нарыг ганц оноо алдалгүй тус бүр 10:0-ээр илүүрхэв.

Мөн “Нур-Султан-2019” насанд хүрэгчдийн ДАШТ-ий хүрэл медальт, үндэсний шигшээ баг, “Женко” клубын тамирчин ОУХМ Б.Болортуяа Алматыгийн дэвжээнд Монголын эмэгтэй бөхчүүдээс “Токио-2020” олимпийн наадмын хоёр дахь эрх авлаа. Тэрбээр хэсэгтээ Казахстаны ТатьянаАманжол Ахметова хийж 9:10-аар ялагдаж, Тажикистаны Ватансултан Шахаршоеваг 10:0-ээр ялсан. Тэгвэл дөнгөж сая хагас шигшээд Тайваний Мен Хуан Хиг цэвэр ялав.

Харин ДАШТ-ий алт, мөнгөн медальт, гавьяат тамирчин С.Цэрэнчимэд олимпийн эрхээ авч чадсангүй. Тэрбээр хагас шигшээд өнгөрсөн жилийн Маттео Пелликонегийн тэмцээнээс хүрэл медальтай даруухан амжилттай БНХАУ-ын Жиа Лонд оноогоор цэвэр (0:10) ялагдлаа. Ингэснээр 62 кг ын жинд манайхан тавдугаар сард Болгарт болох дэлхийн олимпийн эрхийн сүүлийн тэмцээнээс эрхээ авах үлдлээ.

Ц.Намуунцэцэг олимпийн эрхээ авлаа

НЭМЭЛТ:

Эмэгтэйчүүдийн-50 кг-ын жинд 23 хүртэлх насны ДАШТ-ий хүрэл медальт, Азийн аварга, Иван Ярыгиний “Алтан Гранпри”-гийн аварга, улсын гурван удаагийн аварга, үндэсний шигшээ баг, “Хасу-Мегастарс” клубын тамирчин ОУХМ Ц.Намуунцэцэг Монголын чөлөөт бөхийн тамирчдаас “Токио-2020” олимпийн наадмын гурав дахь эрхийг авчирлаа. Тэрбээр Энэтхэгийн Сеема, БНСУ-ын Чёон Ми Ран, Узбекистаны Даулетбик Якшимуратоваг илүүрхэн ялснаар сүүлийн барилдааны үр дүн хамааралгүйгээр олимпийн эрхээ авав. Ц.Намуунцэцэг сүүлийн тойргийн барилдаанаа дэлхийн хошой аварга Японы алдарт Юи Сүсакитай хийнэ.

Б.Хонгорзул хэсгийн аварга болж, Б.Болортуяа ялагдав

НЭМЭЛТ:

57 кг-ын жинд өнгөрсөн жилийн насанд хүрэгчдийн улсын аварга Баянхонгор аймгийн 19 настай тамирчин Б.Хонгорзул Узбекистаны Шохида Ахмедова, Кыргызстаны Назира Марсбек Кызы нарыг тус бүр оноогоор цэвэр (10:0) ялснаар хэсгийн аварга боллоо. Ингэснээр тэрбээр хагас шигшээд эсрэг зооноос хоёроор гарсан бөхтэй олимпийн эрхийн төлөө өрсөлдөнө.

Харин 53 кг-ын жинд “Нур-Султан-2019” ДАШТ-ий хүрэл медальт ОУХМ Б.Болортуяа эхний барилдаанаа Азийн гурван удаагийн аварга Татьяна Аманжол Ахметоватай хийж 9:10-аар ялагдлаа. Угтаа Б.Болортуяа 8:0-ээр илүүрхэж явсан ч хоёр удаа дөрвөн оноо алдаж ялагдал хүлээсэн. Ингэснээр тэрбээр Тажикистаны Ватансултан Шахаршоеваг ялвал хэсгээсээ хоёроор гарч нөгөө хэсгийг тэргүүлсэн бөхтэй олимпийн эрхийн төлөө барилдана.

Монголын гурван бөх хоёрдахь ялалтаа авлаа

НЭМЭЛТ:

Эхний тойрогтоо ялалт байгуулаад байсан Монгол Улсын гавьяат тамирчин О.Бурмаа, Монгол Улсын гавьяат тамирчин С.Цэрэнчимэд, Олон улсын хэмээний мастер Ц.Намуунцэцэг нар БНСУ-ын бөхчүүдээр хоёрдахь ялалтаа авлаа.

50 кг-ынжинд Ц.Намуунцэцэг хоёрдугаар тойргийн барилдаанаа БНСУ-ынЧёон Ми Раныг 11:0-ээр цэвэр ялсан бол 62 кг-д С.Цэрэнчимэд БНСУ-ын Лин Хан Битийг 10:6-гаар, 76 кг-д О.Бурмаа Жон СёоЙоныг 6:3-аар тус тус ялав.

Ц.Намуунцэцэг, О.Бурмаа нар эхний ялалтаа авлаа

Казахстаны Алматы хотод болж буй "Токио-2020" олимпийн наадмын эрх олгох бөхийн төрлүүдийн Азийн сонгон шалгаруулах тэмцээн өнөөдөр/2021.04.10/ эмэгтэйчүүдийн чөлөөт бөхийн төрлөөр эхэллээ. Манай бөхчүүдийн салхийг хагалж, 50 кг-ын жинд ОУХМ Ц.Намуунцэцэг, 76 кг-ын жинд МУГТ О.Бурмаа нар нэгэн зэрэг барилдаж, ялалт байгууллаа. 23 хүртэлх насны ДАШТ-ий хүрэл медальт, Азийн аварга Ц.Намуунцэцэг Энэтхэгийн Сеемаг цэвэр ялсан бол МУГТ О.Бурмаа мөн Энэтхэгийн бөх Поожаг 3:1-ээр ялав.

Өнөөдөр дараах бөхчүүд барилдана.