Умард Ирландын залуус Брекситийн үр дагаврыг эсэргүүцэж байна

Умард Ирландын залуус үзэл бодол, байр сууриа илэрхийлэн эхлүүлсэн жагсаал олон хоног үргэлжилж, сүүлдээ гудамд машин шатааж, цагдаа нар луу тоосго, шатамхай шингэн чулуудах болжээ. Цагдаа нар болон улстөрчид иргэдээ тайван байхыг уриалж байна.

Залуус ИБУИНВУ Европын холбооноос гарсны дараах Умард Ирландын худалдааны дүрэм журам, Белфастын Засгийн газар болон протестант-католик талуудын үл ойлголцол хурцадсаар байгааг эсэргүүцэн жагссан нь энэ аж.

Цагдаа нарын мэдээлснээс үзвэл жагсагчдын ихэнх нь өсвөр насныхан байгаа бөгөөд өнгөрсөн долоо хоногийн сүүлээр Лондондерри, Белфаст хотуудад болсон жагсаалын үеэр олон цагдаа гэмтсэн гэнэ.

ЗАЛУУСЫН ЭСЭРГҮҮЦЭЛ

Жагсаалаас үүдэлтэй эмх замбараагүй байдал энэ сарын 2-ноос эхэлсэн бөгөөд жагсагчид гудамжинд машин шатааж, зам хааж, цагдаа нар луу тоосго, шатамхай шингэн шидэж байв. Улмаар нийт 27 цагдаа гэмтэж, найман хүн баривчлагдсаны хамгийн залуу нь 13, 14 настай хөвгүүд байж.

Тэднээс гадна 15, 21, 18, 19, 17 настай эрэгтэйчүүд, 19 настай эмэгтэй баривчлагдсан бөгөөд энэ сарын 30-нд үймээн самуун өдөөсөн хэргээр шүүхэд дуудагдах аж. Гэвч бага насны хүүхдүүдийн хувьд аль болох өршөөх, хөнгөн шийтгэх төлөвлөгөөтэй байгаа гэнэ.

ЭСЭРГҮҮЦЛИЙН ШАЛТГААН

Умард Ирланд, Их Британийн Нэгдсэн вант улс нь Европын Холбооноос гарсны дараа эдийн засаг ихээр өөрчлөгдөж, ялангуяа тус улсын бүрэлдэхүүнд багтдаг Умард Ирландын улс төрийн тогтворгүй байдал үүссэн юм.

Нэгдсэн Вант улс Европын холбооноос гарсны дараа байгуулагдсан худалдааны гэрээнээс болоод Умард Ирланд болоод Нэгдсэн Вант улсын бусад хэсэг хооронд аливаа барааны хилийн хяналт шалгалт чангарсан байна. Чухамдаа тус худалдааны гэрээ нь Умард Ирланд болон Европын холбооны гишүүн орнуудын хоорондын хилийн хяналт шалгалтаас зайлсхийх зорилготой байсан аж. Учир нь Ирландын нээлттэй хилийн тохиролцоо 1998 оноос хойш энх тайвныг цогцлооход чухал үүрэг гүйцэтгэсээр ирсэн юм. Тухайлбал, тус тохиролцооны ачаар Ирландын бүгд найрамдахчууд, британичууд, Нэгдсэн Вант улсын армийн 3000 гаруй хүний амь үрэгдсэн үл ойлголцол өндөрлөсөн аж.