АНУ-Мексикийн хил дээр хүүхдүүдийг хашаа давуулан шидэж буй бичлэг Америкийн хэвлэлүүдээр цацагджээ. Тодруулбал, тав болон гурван настай хоёр эквадор охиныг хууль бусаар хил нэвтрүүлэгчид шөнийн цагаар хоёр улсыг заагласан 4.2 метрийн өндөр төмөр хашаан дээгүүр давуулан шидэж буй нь АНУ-ын гааль, хилийн хамгаалалтын албаны камерт бичигдсэн байна.

Бичлэгт хоёр эрэгтэй харагдах бөгөөд нэг нь хашаан дээр сууж байгаад охидыг нэг нэгээр нь өндрөөс шидэж буй нь дүрслэгджээ.

Дээрх хоёр охиныг АНУ-ын хилийн харуулын алба хаагчид аварч, Нью-Мексико мужийн Санта Тереза дахь эмнэлгийн үзлэгт оруулж хамгаалалтад аваад байгаа аж. Тус улсын албаныхан хууль бусаар хил давуулагч этгээдүүдийг олж тогтоохоор ажиллаж байгаа юм. Одоогоор АНУ-ын Засгийн газрын хамгаалалтад 17 мянга гаруй хүүхэд байгаа гэж албаны хүн мэдээлжээ. Өдөрт дунджаар 500 орчим хүүхэд харгалзах хүнгүйгээр АНУ-ын хилээр нэвтэрдэг гэж албаны эх сурвалжид дурдсан байна.

Эх сурвалж: Al Jazeera8, BBC