Хөвсгөл аймгийн Нэгдсэн эмнэлгийн молекул биологийн лабораторид 315 сорьцод PCR шинжилгээ хийхэд Цэцэрлэг сумын ойрын хавьтлын хоёр иргэнээс Covid-19 илэрч, нийт батлагдсан тохиолдлын тоо 36 болжээ.

Өнөөдрийн байдлаар Нэгдсэн эмнэлгийн Халдвартын тасагт 14, Цэцэрлэг сумын Эрүүл мэндийн төвд тав, гэрээр гурван иргэн эмчлүүлж буй юм байна. Тус иргэдийн биеийн байдлыг авч үзвэл хүнд нэг, хүндэвтэр найм, хөнгөн 13 иргэн байгаа аж.

Халдвар батлагдсан иргэдийн ойрын болон дам хавьтлуудаас шинжилгээ авч эхэлжээ. Иймд эрсдэл өндөр байгаа энэ үед иргэдийг гэрээсээ гарахгүй байхыг Хөвсгөл аймгийн Эрүүл мэндийн газраас анхааруулан сэрэмжлүүлж байна.

Эрүүл мэндийн яамны 11 цагийн ээлжит мэдээллээр сүүлийн 24 цагт орон нутагт нийт 128 халдварын тохиолдол батлагдсан талаар мэдээлсэн. Үүнд: 

Сэлэнгэ аймаг – 8

Дархан-Уул аймаг – 5

Орхон аймаг – 19

Дорноговь аймаг – 11

Архангай аймаг – 6

Завхан аймаг – 3

Төв аймаг – 22

Хөвсгөл аймаг – 2

Өвөрхангай аймаг – 10

Баянхонгор аймаг – 10

Ховд аймаг – 13

Сүхбаатар аймаг – 11 тус тус илэрсэн байна.