3,411.42
Монгол Улсын шадар сайд С.Амарсайхан халдварын тархалт буурахгүй байгаатай холбогдуулан УОК–ын Шуурхай штаб дээр ажиллаж, авч хэрэгжүүлэх арга хэмжээний талаар зөвлөгөө өглөө. Энэ үеэр Баянзүрх дүүргийн 26 дугаар хороонд тогтоогоод буй хөл хориог маргааш /2021.3.20/ 06.00 цагаас цуцлахаар боллоо.
Тэрбээр "Халдварын тархалтаас үүдэн улаан түвшинд орж ажиллахыг үгүйсгэхгүй. Гэхдээ өнгөрсөн хугацаанд бид аль болох нийтийн хатуу хөл хориог тогтоохгүйг хичээж, голомт дэлгэрсэн, тархалт өндөртэй газруудад хэсэгчлэн тусгаарлалт хийж ирсэн. Энэ утгаараа эрүүл мэндийн байгууллага, ХӨСҮТ-ийн тандалт судалгаанд үндэслэн Баянзүрх дүүргийн 26 дугаар хороонд тав хоногийн хөл хорио тогтоосон. Үүнтэй холбоотойгоор иргэдийн эсэргүүцэлтэй тулгарч, зарим нэгэн харамсалтай хэрэг ч гараад байна. Үүнтэй холбоотойгоор холбогдох хүний саналыг сонсъё. Энэ хугацаанд 11600 өрхөд шинжилгээ хийж, халдваргүйжүүлэлт хийж, иргэдийн санал дээр үндэслэн вакцин хийх ёстой. Энэ ажил ямар түвшинд явна вэ" гэв.
"ОДООГООР 28 ТОХИОЛДОЛ БАТЛАГДААД БАЙНА"
Эрүүл мэндийн сайд С.Энхболд:
-Баянзүрх дүүргийн 26 дугаар хороонд нийт 31 мянга орчим иргэн оршин суудаг. Үүний 17 мянга гаруй иргэнээс шинжилгээ авсан байх ёстой. Хоёр хоногийн хугацаанд эдгээр иргэнээс шинжилгээ авч дууссан. Одоогоор 28 тохиолдол батлагдаад байна. Мөн 500 орчим хүний шинжилгээний хариу гараагүй, лабораторийн шатанд хүлээгдэж байгаа. Тус дүүрэгт өнөөдөр вакцинжуулалт эхэлсэн. Ариутгал, халдваргүйтгэлийг хийж дууссан.
"НИЙТ 17550 ИРГЭНИЙГ ШИНЖИЛГЭЭНД ХАМРУУЛЛАА"
Баянзүрх дүүргийн Засаг дарга Н.Баярмөнх:
-Баянзүрх дүүргийн 26 дугаар хороо нь хамгийн олон хүн амтай хороо. Бид 11600 өрхийг шинжилгээнд хамруулахаас 11058 өрхийн хаалгыг тогшиж, нийт 17550 иргэнийг шинжилгээнд хамрууллаа. Төлөвлөгөөгөөр 16 мянган иргэнийг шинжилгээнд хамруулах байсан ч түрээсийн байр олон байдгаас энэ тоо өндөр гарсан. Шинжилгээгээр батлагдсан тохиолдлуудыг ХӨСҮТ рүү тээвэрлэсэн. Ойрын хавьтлуудыг гэрийн хорионд байлгаж байна. Ариутгал халдваргүйтгэлээ хийчихсэн байгаа. Хорооны иргэд бухимдалтай байна. Анхан шат руу дайрч байна. Тиймээс Засаг даргын хувьд хүсэлтээ НОК-д хүргүүлсэн. Одоо бидэнд дархлаажуулалтын ажил үлдсэн. Тиймээс 50-64 насны 2500 хүн, хөгжлийн бэрхшээлтэй 200 гаруй иргэнийг дархлаажуулалтад хамруулах ёстой. Энэ ажлыг хөл хорио тогтоолгүйгээр явуулж болно.
Холбоотой мэдээ