Хятад улс НҮБ-ын энхийг сахиулагчдад Сovid-19-ийн 300 мянган тун вакцин хандивлах хүсэлтэй байгааг тус улсаас НҮБ-ын дэргэд суугаа байнгын төлөөлөгч Жан Жунь НҮБ-ын Ерөнхий нарийн бичгийн дарга Антониу Гутеррешт уламжилжээ.

Тэрбээр мэдэгдэлдээ “Энэхүү хандив нь Хятадын вакцинуудыг дэлхий нийтийн сайн сайхны төлөө зориулах үйлсийн дараагийн алхам болж байгаа ба тус улс нь НҮБ-д тууштай дэмжлэг үзүүлж буйг илэрхийлэх болно. Хятад улс НҮБ-ын энхийг сахиулагчдын аюулгүй байдалд өндөр ач холбогдол өгдөг. Тиймээс тэднийг Сovid-19-ийн эсрэг вакцинжуулалтад эрт хамруулснаар хүлээсэн үүргээ гүйцэтгэхэд нь чухал хувь нэмэр оруулна гэж үзэж байна” хэмээн дурдсан байна.

Мөн “Цар тахалтай тэмцэх нь дэлхий дахинд тулгамдаж буй хамгийн том асуудал болсон. Вакцин бол хамгийн хүчтэй зэвсэг юм. Хятад улс вакцинуудыг тэгш хуваарилах, ялангуяа хөгжиж буй орнуудад хүртээмжтэй байлгахад өндөр ач холбогдол өгч байна. Мөн цар тахлын эсрэг тэмцэлд ялалт байгуулахын төлөө цуцалтгүй хүчин чармайлт гаргахын тулд улс орнуудтай үргэлжлүүлэн эв санаагаа нэгтгэн ажиллана” гэжээ.

Үүнээс өмнө Энэтхэг улс мөн НҮБ-ын энхийг сахиулагчдад 200 мянган тун вакцин хандивлах хүсэлтэй байгаагаа илэрхийлж байв. Одоогоор НҮБ-аас дээрх хоёр улсын хүсэлтэд тодорхой хариулт өгөөгүй байна.

Эх сурвалж: BUSINESS STANDARD