Цагтаа Италийн Интер Милан болон Бразилын шигшээ багийн од тоглогч байсан Адрианог сүүлийн жилүүдэд дампуурч, гэмт хэргийн бүлэглэлийн гишүүн болсон гэх мэдээ цацагдсан. Тэгвэл 39 настай Адрианогийн хувьд Рио де Жанейрогийн Барра да Тижука гэх хотод сарын 10 мянган фунтын үнэтэй тансаг зэрэглэлийн зочид буудал түрээсэлж амьдарч байгаа аж. Тэрбээр өөрийнхөө тансаг эдлэнг 1.2 сая фунтээр зарсан тул мөнгөөрөө зочид буудал түрээсэлжээ.

Адриано Интер Миланы хамтаар Италийн Сериэ-А лигт дөрвөн удаа, нутгийнхаа Фламенго, Коринтиас клубуудын хамтаар Бразилын дээд лигт хоёр удаа түрүүлж байлаа. Тэрбээр хамгийн сүүлд 2016 онд Майами Юнайтед багтай нэгдэж, ердөө ганцхан тоглолтонд оролцсон түүхтэй.

Нэгэн цаг үед дэлхийн шилдэг довтлогчдын нэгт зүй ёсоор тооцогддог байсан Адрианад аавынх нь үхэл хүнд цохилт болж, эцгийгээ алдсаныхаа дараа архинд донтон, 2010 онд хар тамхи тээвэрлэж яваад цагдаа нарт баригдаж байсан юм. Хожим нь 2014 онд түүний энэхүү хэргийг хаасан билээ.

Өнгөрсөн жил түүнийг нас барсан гэх мэдээ гарч байсан боловч Адриано үүнийг няцаан өдгөө 6.4 сая дагагчидтай инстаграм хуудсаа идэвхитэй хөтлөж байна.

Адриано хамгийн сүүлд 2010 онд Бразилын шигшээ багт дуудагдаж байсан бөгөөд 2004 онд Кака, Роналдиньо зэрэг шилдгүүдийн хамтаар Копа Америкад түрүүлж байв.