АНУ-ын анагаах ухааны мэргэжилтнүүд “Johnson & Johnson” компанийн бүтээсэн Сovid-19-ийн эсрэг “Janssen”  вакциныг хүний биед аюулгүй, дархлаа тогтоох чадвартай гэсэн дүгнэлтэд хүрч, өнгөрсөн сарын 28-ний өдрөөс дотооддоо ашиглахыг зөвшөөрсөн билээ.

Тэгвэл ДЭМБ өчигдөр /2021.03.12/ энэхүү вакциныг яаралтай горимоор ашиглах зөвшөөрлийг олгожээ. Ингэснээр уг вакцин нь ДЭМБ-аас зөвшөөрөл авсан гурав дахь вакцин болж байна. Үүнээс өмнө АНУ-ын “Pfizer/BioNTech” болон Оксфордын их сургууль,  “AstraZeneca” компанийн хамтран бүтээсэн хоёр вакцинд зөвшөөрөл олгоод байсан юм.

“Johnson & Johnson”-ий вакцин нь бусад вакцинуудыг бодвол нэг тунгаар хийдэг учир өртөг хямдаас гадна энгийн хөргөгчинд хадгалж болдгоороо давуу талтай юм. Гэхдээ уг вакцин нь Сovid-19-ийн мутацид орсон шинэ хувилбаруудаас хамгаалах чадвар сул болох нь туршилтаар ажиглагдсан. Энгийн Сovid-19 халдвараас 85 хувь хамгаалж байгаа бол шинэ мутацийн эсрэг 66 хувийн дархлаа тогтоожээ.

ДЭМБ-аас санаачлан хэрэгжүүлж буй дэлхийн улс орнуудад Сovid-19-ийн вакциныг тэгш хуваарилах “COVAX” хөтөлбөр дээрх вакцинаас 500 сая тунг захиалсан байна.

Эх сурвалж: New York Times