Дональд Трамп АНУ-ын Ерөнхийлөгчийн суудлаас буугаад хэдэн сар өнгөрсөн ч Хятадын цахим орчинд түүний нэр, нөлөө хэвээр байгаа бололтой. Тухайлбал, Хятадын хамгийн том худалдааны сайт Таобао дээр Трампын дүр төрхийг ашиглан бүтээсэн бүтээлүүд зарагдсаар байгаа аж. Жишээ нь, хамгийн сүүлд завилж суугаад зэн байрлал авч, нүдээ аньсан, бодит хэмжээтэй Трампын хөшөө зарагдаж эхэлжээ. Тус хөшөөний тайлбар дээр Трампын “Америкийг дахин агуу болгоё” хэмээх гол уриа үгийг өөрчлөн, “Өөрийгөө дахин агуу болго” хэмээн бичсэн байх бөгөөд үнэ нь 999 юань буюу 153 ам.доллар аж.

Энэ бол Хятадын худалдааны сайтууд Трампын төрхийг ашиглан бүтээсэн бараагаа борлуулж буй анхны тохиолдол биш юм. Мөн Таобао сайт дээр өмнө нь Трампын царайг хэвлэсэн ариун цэврийн цаас, Трампын үсийг дуурайлган хийсэн суултуурын сойз, Трампын царай бүхий футболка зэрэг бараа олон зарагдаж байв.

Эх сурвалж: SCMP