Эрүүл мэндийн яамнаас Covid-19-ийн талаарх цаг үеийн ээлжит (2021.02.28) мэдээллээ хийлээ.

ХӨСҮТ-ийн албаны дарга Ж.БАЙГАЛЬМАА:

-Өчигдөр нийслэлд шинээр 41 хүнээс халдвар илэрлээ. Эдгээр тохиолдлын нэг нь Алтанбулаг боомтоор татан авалтаар ирсэн хүн. Өнгөрсөн хугацаанд 2249 хүн эдгэрсэн байна. 643 хүн эмчлүүлж байгаагаас биеийн байдал хөнгөн 561, хүндэвтэр 73, хүнд 8, нэн хүнд 1 хүн байна. Өнгөрсөн 24 цагийн хугацаанд 66 хүн эдгэрч эмнэлгээс гарсан. Улаанбаатараас илэрсэн 40 тохиолдлоос 20 нь "Нэг хаалга-Нэг шинжилгээ" арга хэмжээний хүрээнд халдвар илэрсэн хүмүүсийн ойрын хавьтал юм. 14 хүн хяналтад авсан халдварын голомтоос илэрсэн бол зургаан хүний халдварын эх уурхайг тодорхойлохоор ажиллаж байна. 

ЭМЯ-ны ахлах шинжээч Д.НАРАНГЭРЭЛ:

-Вакциныг гурван өрөө дамжиж хийлгэж байна. Эрүүл мэндийн үзлэгт орсны дараа вакцинаа хийлгэнэ. Дараа нь 30 минут ажиглалтад байна. Вакцин хийлгэхдээ дулаан хувцаслаж ирэх, сүүлийн нэг сарын хугацаанд вакцин хийлгээгүй, архи тамхи, сэтгэцэд нөлөөтэй эм хэрэглэхгүй байхыг зөвлөж байна. Вакцин хийлгэсний дараа тодорхой хэмжээний дэглэм сахина. Ингэхдээ вакцин тарьсан газрыг хөндөхгүй, хоёр өдөр ус хүргэхгүй, вакцин хийлгэсний дараа гурав хоногийн дотор архи согтууруулах ундаа хэрэглэхгүй байх ёстой. Хэдийгээр вакцин хийлгэсэн ч халдвар авч, бусдад тараах эрсдэл байгаа учраас амны хаалтаа зүүж, хүн хоорондын зай барих нь чухал. Сүүлийн өдрүүдэд иргэдийн дунд Covid-19 биднээс холдсон юм шиг тайван, назгайрах байдал ажиглагдаж байна. Аюул ойрхон байна. Ялангуяа хаврын улиралд хүмүүсийн дархлаа сулардаг, амьсгалын замын халдварт өвчнөөр өвддөг учраас нийслэл хот халдварын идэвхтэй голомт болох магадлалтай. Тиймээс иргэд анхаарлаа огтхон ч сулруулж болохгүй.

Э.БУРАМ